har-gam par the shams-o-qamar us dayar mein

har-gām par the shams-o-qamar us dayār meñ

kitne hasīñ the shām-o-sahar us dayār meñ

vo baaġh vo bahār vo dariyā vo sabza-zār

nashshoñ se kheltī thī nazar us dayār meñ

āsān thā safar ki har ik rahguzār par

milte the sāya-dār shajar us dayār meñ

har-chand thī vahāñ bhī ḳhizāñ kī udaas dhuup

dil par nahīñ thā ġham kā asar us dayār meñ

mahsūs ho rahā thā sitāre haiñ gard-e-rāh

ham the hazār ḳhāk-basar us dayār meñ

'jālib' yahāñ to baat garebāñ tak aa ga.ī

rakhte the sirf chāk-jigar us dayār meñ

har-gam par the shams-o-qamar us dayar mein

kitne hasin the sham-o-sahar us dayar mein

wo bagh wo bahaar wo dariya wo sabza-zar

nashshon se khelti thi nazar us dayar mein

aasan tha safar ki har ek rahguzar par

milte the saya-dar shajar us dayar mein

har-chand thi wahan bhi KHizan ki udas dhup

dil par nahin tha gham ka asar us dayar mein

mahsus ho raha tha sitare hain gard-e-rah

hum the hazar KHak-basar us dayar mein

'jalib' yahan to baat gareban tak aa gai

rakhte the sirf chaak-jigar us dayar mein