har gham gham-e-taza hai ye shadab hai sina

har ġham ġham-e-tāza hai ye shādāb hai siina

aisā bhī to is daur meñ nāyāb hai siina

hañgām-e-ḳhamīdan bhī ye sar ḳham nahīñ hotā

yuuñ kahne ko ganjīna-e-ādāb hai siina

jaise ki na aa.ī hai na aa.egī koī aur

har sub.h ko is taur se betāb hai siina

bātin pe nazar kiije to ik bahr hai zaḳhḳhār

zāhir pe nazar kiije to pāyāb hai siina

kab dasht-o-jabal koh-o-daman raah meñ aa.eñ

ho soz jo siine meñ to sailāb hai siina

zāhir meñ to jo kuchh hai vo asbāb-e-jahāñ hai

bātin meñ yahī chashma-e-asbāb hai siina

āñkheñ to barastī haiñ barastī hī raheñgī

kyuuñ Duub na jaa.eñ ki tah-e-āb hai siina

jis baab meñ āsār-e-ġhazālān-e-ajam haiñ

tauret kā qur.ān kā vo baab hai siina

har-dam mire hoñToñ se chhalaktī hai gulābī

betāb sī ik mauj-e-mai-e-nāb hai siina

bastī meñ ajab daulat-e-bedār haiñ āñkheñ

vīrāne meñ ik daulat-e-nāyāb hai siina

bedārī meñ soyā huā qatre meñ talātum

aur ḳhvāb meñ jaagā huā sailāb hai siina

hai rañj kā aalam bhī koī aish kā aalam

har-lahza ajab ālam-e-sad-ḳhvāb hai siina

aalam hai agar raaz to ye shīsha-e-jam hai

aalam hai agar saaz to mizrāb hai siina

allāh ġhanī kahiye ki allāh ġhanī hai

vo taab atā kī hai jahāñ-tāb hai siina

har gham gham-e-taza hai ye shadab hai sina

aisa bhi to is daur mein nayab hai sina

hangam-e-KHamidan bhi ye sar KHam nahin hota

yun kahne ko ganjina-e-adab hai sina

jaise ki na aai hai na aaegi koi aur

har subh ko is taur se betab hai sina

baatin pe nazar kije to ek bahr hai zaKHKHar

zahir pe nazar kije to payab hai sina

kab dasht-o-jabal koh-o-daman rah mein aaen

ho soz jo sine mein to sailab hai sina

zahir mein to jo kuchh hai wo asbab-e-jahan hai

baatin mein yahi chashma-e-asbab hai sina

aankhen to barasti hain barasti hi rahengi

kyun Dub na jaen ki tah-e-ab hai sina

jis bab mein aasar-e-ghazalan-e-ajam hain

tauret ka quran ka wo bab hai sina

har-dam mere honTon se chhalakti hai gulabi

betab si ek mauj-e-mai-e-nab hai sina

basti mein ajab daulat-e-bedar hain aankhen

virane mein ek daulat-e-nayab hai sina

bedari mein soya hua qatre mein talatum

aur KHwab mein jaga hua sailab hai sina

hai ranj ka aalam bhi koi aish ka aalam

har-lahza ajab aalam-e-sad-KHwab hai sina

aalam hai agar raaz to ye shisha-e-jam hai

aalam hai agar saz to mizrab hai sina

allah ghani kahiye ki allah ghani hai

wo tab ata ki hai jahan-tab hai sina