har ghaDi ka sath dukh deta hai jaan-e-man mujhe

har ghaḌī kā saath dukh detā hai jān-e-man mujhe

har koī kahne lagā tanhā.ī kā dushman mujhe

din ko kirneñ raat ko jugnū pakaḌne kā hai shauq

jaane kis manzil meñ le jā.egā pāgal-pan mujhe

saada kāġhaz rakh ke aayā huuñ numā.ish-gāh meñ

dekh kar hotī thī har tasvīr ko uljhan mujhe

nāchtā thā paañv meñ lamhoñ ke ghuñgrū bāñdh kar

de gayā dhokā simaT kar vaqt kā āñgan mujhe

nekiyoñ ke phal nahīñ lagte badī ke peḌ par

us ne vāpas kar diyā hai phir tahī-dāman mujhe

dosto sun lī ḳhudā ne kal mirī pahlī duā

sharm se āḳhir jhukānī paḌ ga.ī gardan mujhe

kyā milā tujh ko batā andhe se lāThī chhīn kar

kar diyā kyuuñ aas se mahrūm jān-e-man mujhe

sard ho saktī nahīñ 'sājid' kabhī siine kī aag

dil jalāne ko milā hai yaad kā īñdhan mujhe

har ghaDi ka sath dukh deta hai jaan-e-man mujhe

har koi kahne laga tanhai ka dushman mujhe

din ko kirnen raat ko jugnu pakaDne ka hai shauq

jaane kis manzil mein le jaega pagal-pan mujhe

sada kaghaz rakh ke aaya hun numaish-gah mein

dekh kar hoti thi har taswir ko uljhan mujhe

nachta tha panw mein lamhon ke ghungru bandh kar

de gaya dhoka simaT kar waqt ka aangan mujhe

nekiyon ke phal nahin lagte badi ke peD par

us ne wapas kar diya hai phir tahi-daman mujhe

dosto sun li KHuda ne kal meri pahli dua

sharm se aaKHir jhukani paD gai gardan mujhe

kya mila tujh ko bata andhe se laThi chhin kar

kar diya kyun aas se mahrum jaan-e-man mujhe

sard ho sakti nahin 'sajid' kabhi sine ki aag

dil jalane ko mila hai yaad ka indhan mujhe