har ghaDi ka sath hai ab kaun si tanhai hai

har ghaḌī kā saath hai ab kaun sī tanhā.ī hai

'aks terā saath mere yaad kī parchhā.ī hai

mausamoñ kī barf bhī nākām ho kar rah ga.ī

aag us ne tan badan meñ is qadar dahkā.ī hai

bhiiḌ kā har faisla qānūn kaise ban gayā

baat sachchī hai magar is baat meñ rusvā.ī hai

hai nasīboñ se milā ġham kā ḳhazānā dosto

ye tabī'at aaj lekin kis liye ghabrā.ī hai

suukh kar kāñTā huī hai phuul jaisī thī kabhī

maut behtar lag rahī hai zindagī kum.hlā.ī hai

Tuut kar bah jā.ūñgā maiñ bhī kināroñ kī tarah

dekh leñge phir samundar jo tirī gahrā.ī hai

moḌ koī bhī nahīñ thā is kahānī meñ 'rafīq'

baat sīdhī saaf thī kyoñ aap ne uljhā.ī hai

har ghaDi ka sath hai ab kaun si tanhai hai

'aks tera sath mere yaad ki parchhai hai

mausamon ki barf bhi nakaam ho kar rah gai

aag us ne tan badan mein is qadar dahkai hai

bhiD ka har faisla qanun kaise ban gaya

baat sachchi hai magar is baat mein ruswai hai

hai nasibon se mila gham ka KHazana dosto

ye tabi'at aaj lekin kis liye ghabrai hai

sukh kar kanTa hui hai phul jaisi thi kabhi

maut behtar lag rahi hai zindagi kumhlai hai

Tut kar bah jaunga main bhi kinaron ki tarah

dekh lenge phir samundar jo teri gahrai hai

moD koi bhi nahin tha is kahani mein 'rafiq'

baat sidhi saf thi kyon aap ne uljhai hai