har ghaDi mujhko be-qarar na kar

har ghaḌī mujh ko be-qarār na kar

zindagī merī sogvār na kar

jis ke sāhil kā kuchh patā hī nahīñ

aisī kashtī ko iḳhtiyār na kar

be-ḳhudī merī be-ḳhudī na rahe

itnā ehsān ġham-gusār na kar

is qadar mujh pe iltifāt-o-karam

mere mohsin tū sharmsār na kar

paak kar le havas se dil pahle

kaun kahtā hai tujh ko pyaar na kar

apne vā'de kā rakh bharam ai dost

kisht-e-ummīd reg-zār na kar

ḳhair-ḳhvāhī ke naam par hargiz

mere 'aiboñ kā ishtihār na kar

aadmī hai to aadmī hī rah

ādmiyyat ko dāġhdār na kar

jo 'sahar' dil se bhuul baiThā ho

tazkira us kā baar baar na kar

har ghaDi mujh ko be-qarar na kar

zindagi meri sogwar na kar

jis ke sahil ka kuchh pata hi nahin

aisi kashti ko iKHtiyar na kar

be-KHudi meri be-KHudi na rahe

itna ehsan gham-gusar na kar

is qadar mujh pe iltifat-o-karam

mere mohsin tu sharmsar na kar

pak kar le hawas se dil pahle

kaun kahta hai tujh ko pyar na kar

apne wa'de ka rakh bharam ai dost

kisht-e-ummid reg-zar na kar

KHair-KHwahi ke nam par hargiz

mere 'aibon ka ishtihaar na kar

aadmi hai to aadmi hi rah

aadmiyyat ko daghdar na kar

jo 'sahar' dil se bhul baiTha ho

tazkira us ka bar bar na kar