har gul-e-taza hamare hath par baiat kare

har gul-e-tāza hamāre haath par bai.at kare

us kī zulfoñ tak pahuñchne ke liye minnat kare

dil bachā.e yā sarāhe ātish-e-ruḳhsār ko

jis kā ghar jaltā ho vo sho.aloñ kī kyā mid.hat kare

aam ke phūloñ ko ḳhud hī jhaaḌ de aur is ke ba.ad

be-samar shāḳhoñ se āvāra havā hujjat kare

shahr vāloñ ko bhī hājat hai anājoñ kī magar

ḳhush-libāsī mausam-e-barsāt par la.anat kare

yuuñ bahāne se chhupā luuñ apne ashkoñ ko magar

aañkh kī surḳhī dil-e-pur-dard kī ġhībat kare

ḳhuun ke do chaar qatre dil meñ haiñ baaqī 'zahīr'

dashna-e-mizhgāñ se kah do ik zarā zahmat kare

har gul-e-taza hamare hath par baiat kare

us ki zulfon tak pahunchne ke liye minnat kare

dil bachae ya sarahe aatish-e-ruKHsar ko

jis ka ghar jalta ho wo shoalon ki kya midhat kare

aam ke phulon ko KHud hi jhaD de aur is ke baad

be-samar shaKHon se aawara hawa hujjat kare

shahr walon ko bhi hajat hai anajon ki magar

KHush-libasi mausam-e-barsat par lanat kare

yun bahane se chhupa lun apne ashkon ko magar

aankh ki surKHi dil-e-pur-dard ki ghibat kare

KHun ke do chaar qatre dil mein hain baqi 'zahir'

dashna-e-mizhgan se kah do ek zara zahmat kare