har haqiqat ko ba-andaz-e-tamasha dekha

har haqīqat ko ba-andāz-e-tamāshā dekhā

ḳhuub dekhā tire jalvoñ ko magar kyā dekhā

justujū meñ tirī ye hāsil-e-saudā dekhā

ek ik zarre kā āġhosh-e-talab vā dekhā

ā.īna-ḳhāna-e-ālam meñ kaheñ kyā dekhā

tere dhoke meñ ḳhud apnā hī tamāshā dekhā

ham ne aisā na koī dekhne vaalā dekhā

jo ye kah de ki tirā husn sarāpā dekhā

dil-e-āgāh meñ kyā kahiye 'jigar' kyā dekhā

lahreñ letā huā ik qatre meñ dariyā dekhā

koī shā.ista-o-shāyān-e-ġham-e-dil na milā

ham ne jis bazm meñ dekhā use tanhā dekhā

har haqiqat ko ba-andaz-e-tamasha dekha

KHub dekha tere jalwon ko magar kya dekha

justuju mein teri ye hasil-e-sauda dekha

ek ek zarre ka aaghosh-e-talab wa dekha

aaina-KHana-e-alam mein kahen kya dekha

tere dhoke mein KHud apna hi tamasha dekha

hum ne aisa na koi dekhne wala dekha

jo ye kah de ki tera husn sarapa dekha

dil-e-agah mein kya kahiye 'jigar' kya dekha

lahren leta hua ek qatre mein dariya dekha

koi shaista-o-shayan-e-gham-e-dil na mila

hum ne jis bazm mein dekha use tanha dekha