har inT sochti hai ki diwar us se hai

har iiñT sochtī hai ki dīvār us se hai

har sar yahī samajhtā hai dastār us se hai

hai aag peT kī tabhī chham-chham hai raqs meñ

paa.el samajhtī hai ki ye jhankār us se hai

ummīd un se koī lagānā hī hai fuzūl

har mantarī kī soch hai sarkār us se hai

ghar ko banā.eñ ghar sadā ghar ke hī log sab

aur aadmī samajhtā hai parivār us se hai

kartī haiñ paar kashtī duā.eñ hī asl meñ

māñjhī kā sochnā hai ki patvār us se hai

insān kā ġhurūr ye kahne lagā hai ab

sansār se nahīñ hai vo sansār us se hai

kaise banegī baat mohabbat kī ai 'rajat'

iz.hār ab talak na kiyā pyaar us se hai

har inT sochti hai ki diwar us se hai

har sar yahi samajhta hai dastar us se hai

hai aag peT ki tabhi chham-chham hai raqs mein

pael samajhti hai ki ye jhankar us se hai

ummid un se koi lagana hi hai fuzul

har mantari ki soch hai sarkar us se hai

ghar ko banaen ghar sada ghar ke hi log sab

aur aadmi samajhta hai pariwar us se hai

karti hain par kashti duaen hi asl mein

manjhi ka sochna hai ki patwar us se hai

insan ka ghurur ye kahne laga hai ab

sansar se nahin hai wo sansar us se hai

kaise banegi baat mohabbat ki ai 'rajat'

izhaar ab talak na kiya pyar us se hai