har ek jaanib un aankhon ka ishaara ja raha hai

har ik jānib un āñkhoñ kā ishāra jā rahā hai

hameñ kin imtihānoñ se guzārā jā rahā hai

kināre ko bachā.ūñ to nadī jaatī hai mujh se

nadī ko thāmtā huuñ to kinārā jā rahā hai

maiñ Duubā jā rahā huuñ un sadāoñ ke bhañvar meñ

mujhe ab chāroñ jānib se pukārā jā rahā hai

ta.āqub mat karo us ke badan kī raushnī kā

ki ye to sirf us kā isti.āra jā rahā hai

ye saarā khel fat.h-e-shāh kā hai jis kī ḳhātir

pyādoñ jaise insānoñ ko haarā jā rahā hai

ab us ruḳhsār kā til hai alāmat us bhañvar kī

jahāñ saarā samarqand-o-buḳhārā jā rahā hai

mire ash.ār haiñ vo āsmānī ḳhvāb jin ko

mirī miTTī ke hoñThoñ par utārā jā rahā hai

vahīñ chashm-o-lab-o-ruḳhsār bhī jaate haiñ us ke

jahāñ ye husn kā saarā idāra jā rahā hai

maiñ sāhil ho gayā huuñ jab se vo dariyā huā hai

nazar Thahrī huī hai aur nazārā jā rahā hai

to kyā ye vasl kī shab hai ki jab ghar se bichhaḌ ke

na jaane kis ke ghar merā sitārā jā rahā hai

alam-bardār tanhā.ī thā apnā 'farhat-ehsās'

hujūm-e-shahr ke hāthoñ jo maarā jā rahā hai

har ek jaanib un aankhon ka ishaara ja raha hai

hamein kin imtihanon se guzara ja raha hai

kinare ko bachaun to nadi jati hai mujh se

nadi ko thamta hun to kinara ja raha hai

main Duba ja raha hun un sadaon ke bhanwar mein

mujhe ab chaaron jaanib se pukara ja raha hai

taaqub mat karo us ke badan ki raushni ka

ki ye to sirf us ka istiara ja raha hai

ye sara khel fath-e-shah ka hai jis ki KHatir

pyaadon jaise insanon ko haara ja raha hai

ab us ruKHsar ka til hai alamat us bhanwar ki

jahan sara samarqand-o-buKHara ja raha hai

mere ashaar hain wo aasmani KHwab jin ko

meri miTTi ke honThon par utara ja raha hai

wahin chashm-o-lab-o-ruKHsar bhi jate hain us ke

jahan ye husn ka sara idara ja raha hai

main sahil ho gaya hun jab se wo dariya hua hai

nazar Thahri hui hai aur nazara ja raha hai

to kya ye wasl ki shab hai ki jab ghar se bichhaD ke

na jaane kis ke ghar mera sitara ja raha hai

alam-bardar tanhai tha apna 'farhat-ehsas'

hujum-e-shahr ke hathon jo mara ja raha hai