har ik ke tajrbe se muḳhtalif hai tajraba merā
na kyuuñ sab se alag ho zindagī par tabsira merā
nahīñ mā'lūm kitnī martaba marnā paḌā mujh ko
jiye jaanā mirā har-hāl meñ hai mo'jiza merā
mirī hastī nahīñ mahdūd hargiz chand lamhoñ tak
azal se tā-abad jaarī rahegā silsila merā
ye mujh se mashvara kyuuñ hai mirī qismat ke baare meñ
tumhārā faisla jo hai vahī hai faisla merā
'munavvar' pahle apne zauq par tanqīd farmā leñ
mire ahbāb nāhaq le rahe haiñ jā.eza merā
har ek ke tajrbe se muKHtalif hai tajraba mera
na kyun sab se alag ho zindagi par tabsira mera
nahin ma'lum kitni martaba marna paDa mujh ko
jiye jaana mera har-haal mein hai mo'jiza mera
meri hasti nahin mahdud hargiz chand lamhon tak
azal se ta-abad jari rahega silsila mera
ye mujh se mashwara kyun hai meri qismat ke bare mein
tumhaara faisla jo hai wahi hai faisla mera
'munawwar' pahle apne zauq par tanqid farma len
mere ahbab nahaq le rahe hain jaeza mera
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
