har ek KHwab-e-pareshan ko to suljhaya nahin jata

har ik ḳhvāb-e-pareshāñ ko to suljhāyā nahīñ jaatā

jo ġham hai dostoñ kā vo bhī samjhāyā nahīñ jaatā

vo ik mushkil jo kū-e-yār se dār-o-rasan tak thī

vajūd us kā dimāġh-o-dil meñ ab paayā nahīñ jaatā

harārat ishq kī Duubī salāsil kī sadāoñ meñ

zabāñ par garmi-e-lab kyā hai batlāyā nahīñ jaatā

kabhī ham saath rahte the kabhī nārāz ho jaate

na jaane zehn se kyoñ pyaar kā saayā nahīñ jaatā

ajab sī ek uljhan hai ayaañ karnā bhī mushkil hai

hiqārat kā nivālā ham se to khāyā nahīñ jaatā

badan meñ aag hai 'māhir' na ThanDak koī bātoñ meñ

nigāhoñ se koī dil aaj garmāyā nahīñ jaatā

har ek KHwab-e-pareshan ko to suljhaya nahin jata

jo gham hai doston ka wo bhi samjhaya nahin jata

wo ek mushkil jo ku-e-yar se dar-o-rasan tak thi

wajud us ka dimagh-o-dil mein ab paya nahin jata

hararat ishq ki Dubi salasil ki sadaon mein

zaban par garmi-e-lab kya hai batlaya nahin jata

kabhi hum sath rahte the kabhi naraaz ho jate

na jaane zehn se kyon pyar ka saya nahin jata

ajab si ek uljhan hai ayan karna bhi mushkil hai

hiqarat ka niwala hum se to khaya nahin jata

badan mein aag hai 'mahir' na ThanDak koi baaton mein

nigahon se koi dil aaj garmaya nahin jata