har ek mahaz ko tanha sambhaale baiThe hain

har ik mahāz ko tanhā sambhāle baiThe haiñ

ham ek dil meñ ka.ī rog paale baiThe haiñ

abhī na zor dikhā.e ye kah do āñdhī se

abhī ham apne irādoñ ko Taale baiThe haiñ

sitamgaroñ ne bahāroñ pe kar liyā qabza

chaman ko ḳhūn-e-jigar dene vaale baiThe haiñ

batā.eñ kyā ki hamāre hī rahnumā ab to

hamārī raah meñ ḳhanjar nikāle baiThe haiñ

zamīñ pe apnā baserā to hai magar 'qaisar'

nigāheñ chāñd-sitāroñ pe Daale baiThe haiñ

har ek mahaz ko tanha sambhaale baiThe hain

hum ek dil mein kai rog pale baiThe hain

abhi na zor dikhae ye kah do aandhi se

abhi hum apne iradon ko Tale baiThe hain

sitamgaron ne bahaaron pe kar liya qabza

chaman ko KHun-e-jigar dene wale baiThe hain

bataen kya ki hamare hi rahnuma ab to

hamari rah mein KHanjar nikale baiThe hain

zamin pe apna basera to hai magar 'qaisar'

nigahen chand-sitaron pe Dale baiThe hain