har ek taKHliq paedar ho aisa nahin hota

har ik taḳhlīq pā.edār ho aisā nahīñ hotā

hamesha be-karāñ iz.hār ho aisā nahīñ hotā

ye maanā she'r meñ takrār-e-lafzī husn-parvar hai

magar har baat meñ takrār ho aisā nahīñ hotā

shutur-gurba kī ḳhāmī ho yā koī 'aib-e-ītā ho

ġhazal meñ 'aib kā bāzār ho aisā nahīñ hotā

koī matla' to kahtā hai magar maqta' nahīñ kahtā

magar har she'r pā.edār ho aisā nahīñ hotā

ravānī vazn-o-bahr-o-qāfiya kā paas ho jis meñ

ġhazal vo zīnat-e-aḳhbār ho aisā nahīñ hotā

tamanna hai agar sāhil ko paane kī to kuchh kiije

binā patvār kashtī paar ho aisā nahīñ hotā

agar himmat kareñ to pā.eñge 'nāshād' bhī manzil

koī rasta sadā dushvār ho aisā nahīñ hotā

har ek taKHliq paedar ho aisa nahin hota

hamesha be-karan izhaar ho aisa nahin hota

ye mana she'r mein takrar-e-lafzi husn-parwar hai

magar har baat mein takrar ho aisa nahin hota

shutur-gurba ki KHami ho ya koi 'aib-e-ita ho

ghazal mein 'aib ka bazar ho aisa nahin hota

koi matla' to kahta hai magar maqta' nahin kahta

magar har she'r paedar ho aisa nahin hota

rawani wazn-o-bahr-o-qafiya ka pas ho jis mein

ghazal wo zinat-e-aKHbar ho aisa nahin hota

tamanna hai agar sahil ko pane ki to kuchh kije

bina patwar kashti par ho aisa nahin hota

agar himmat karen to paenge 'nashad' bhi manzil

koi rasta sada dushwar ho aisa nahin hota