har jagah nazar aaya sahib-e-nazar tanha

har jagah nazar aaya sāhib-e-nazar tanhā

qalb meñ sadaf ke bhī dekhā hai guhar tanhā

bujh sakegī kitnoñ kī pyaas ḳhuun se mere

be-shumār teġheñ haiñ aur merā sar tanhā

faiz kuchh tirā bhī thā baḳhshish-e-junūñ bhī thī

ik hujūm thā pīchhe ham chale jidhar tanhā

mehr-o-mah khilā.e be-intihā se rishta hai

kyoñ samajhtā hai apne aap ko bashar tanhā

sair chāñd tāroñ kī sāthiyoñ mubārak ho

rah gayā qafas meñ ab maiñ shikasta-par tanhā

ek apnā aalam ḳhud hai banā liyā ham ne

saath meñ rahī duniyā ham rahe magar tanhā

thī salīb kāñdhoñ par jā rahe the maqtal ko

saath the bahut apne sab rahe magar tanhā

manzileñ judā sab kī rahguzar alag sab ke

rah gayā hai duniyā meñ apnī har bashar tanhā

kis ko fikr thī merī narġha-e-havādis meñ

muztarib dikhā.ī dī terī ik nazar tanhā

har jagah nazar aaya sahib-e-nazar tanha

qalb mein sadaf ke bhi dekha hai guhar tanha

bujh sakegi kitnon ki pyas KHun se mere

be-shumar teghen hain aur mera sar tanha

faiz kuchh tera bhi tha baKHshish-e-junun bhi thi

ek hujum tha pichhe hum chale jidhar tanha

mehr-o-mah khilae be-intiha se rishta hai

kyon samajhta hai apne aap ko bashar tanha

sair chand taron ki sathiyon mubarak ho

rah gaya qafas mein ab main shikasta-par tanha

ek apna aalam KHud hai bana liya hum ne

sath mein rahi duniya hum rahe magar tanha

thi salib kandhon par ja rahe the maqtal ko

sath the bahut apne sab rahe magar tanha

manzilen juda sab ki rahguzar alag sab ke

rah gaya hai duniya mein apni har bashar tanha

kis ko fikr thi meri nargha-e-hawadis mein

muztarib dikhai di teri ek nazar tanha