har KHata uski hamesha darguzar karti hui

har ḳhatā us kī hamesha darguzar kartī huī

fāsloñ ko dil kī chāhat muḳhtasar kartī huī

zehn-o-dil kī raushnī ko tez-tar kartī huī

guftugū sīdhe tirī dil par asar kartī huī

mere jazboñ ke fusūñ meñ qaid vo hotā huā

us ke lahje kī khanak mujh par asar kartī huī

zindagī kī tez-gāmī aur daulat kī havas

aane vaale kal se ham ko be-ḳhabar kartī huī

hausla detā huā sā mujh ko merā e'timād

be-yaqīnī dil meñ paidā Dar pe Dar kartī huī

bholā-pan aur sādgī par us kī maiñ miTtā huā

ek sūrat mohnī sī dil meñ ghar kartī huī

kis ko ye mālūm ai 'nāyāb' nisbat kis kī hai

mere har naqsh-e-qadam ko mo'atabar kartī huī

har KHata us ki hamesha darguzar karti hui

faslon ko dil ki chahat muKHtasar karti hui

zehn-o-dil ki raushni ko tez-tar karti hui

guftugu sidhe teri dil par asar karti hui

mere jazbon ke fusun mein qaid wo hota hua

us ke lahje ki khanak mujh par asar karti hui

zindagi ki tez-gami aur daulat ki hawas

aane wale kal se hum ko be-KHabar karti hui

hausla deta hua sa mujh ko mera e'timad

be-yaqini dil mein paida Dar pe Dar karti hui

bhola-pan aur sadgi par us ki main miTta hua

ek surat mohni si dil mein ghar karti hui

kis ko ye malum ai 'nayab' nisbat kis ki hai

mere har naqsh-e-qadam ko mo'atabar karti hui