har mauj-e-hawadis rakhti hai sine mein bhanwar kuchh pinhan bhi

har mauj-e-havādis rakhtī hai siine meñ bhañvar kuchh pinhāñ bhī

rahte haiñ muqābil hī aksar ishkāl bhī dil meñ īmāñ bhī

shahroñ kī chamak ne āñkhoñ ko dikhlā.e vo manzar jin ke liye

qadroñ kā taġhayyur kyā kahiye chhoḌ aa.e zamīneñ dahqāñ bhī

har samt laraztī chīḳheñ haiñ jalte hue ġhunchoñ, kaliyoñ kī

pūchhe hai zamīn-e-gul ham se kyā kuchh hai ilāj-e-vīrāñ bhī

taḳhlīq-e-ajā.ib laakh huī fil-asr ye uqda apnī jagah

ik harf-e-vafā kī qāmat par ye 'ahd rahā hai hairāñ bhī

thī soch ye manfī lagne lagī musbat bhī jo nā'ra ban ke yahāñ

āzādī-e-nisvāñ kah kah kar aurat ko kiyā hai uryāñ bhī

is shahar-e-kasāfat meñ aa kar ojhal hue āñkhoñ se manzar

vo gaañv kā sabza vo bahr-o-bar vo dhuup vo barq-o-bārāñ bhī

ik 'ishq meñ likh likh kar kaaTā har lafz kitāb-e-hastī kā

kar Daalā usī ne zer-o-zabar jo kaam lage thā āsāñ bhī

gardish meñ zamāna hai har pal ummīd pe duniyā hai qaa.em

kal jin se the sahme sahme se ham, haiñ aaj vo larzāñ larzāñ bhī

asrār-e-zamāna ban ban kar aate haiñ yahāñ din raat magar

fitrat ke masā.ib se ab tak haarā hai kahāñ ye insāñ bhī

ho paa.e kisī ke ham bhī kahāñ yuuñ koī hamārā bhī na huā

kab Thahrī kisī ik par bhī nazar kyā chiiz hai shahr-e-ḳhūbāñ bhī

insāñ kā samajhnā hai bāqī, anjām ko pahuñche hai duniyā

ban jaa.e farishta jab chāhe ho jaa.e ye aksar haivāñ bhī

Dartā hai dil-e-kam-fahm yahāñ kyā jāniye kyā ho bastī kā

rahte haiñ ab ahl-e-ulfat ke ham-rāh ye nafrat-sāzāñ bhī

aajiz hai ye insāñ apnī hī sunā.ī pe jab jab ġhaur kare

hai farq numāyāñ har ik meñ phir bhī hai sabhī kuchh yaksāñ bhī

isbāt-e-tafakkur rakhtā hai ham tum meñ tavāzun bhī lekin

rishtoñ par paḌī jab barf-anā kaam aa.e na 'ahd-o-paimāñ bhī

me.ār-e-adab bhī Thahre sadā ho ahl-e-jahāñ ke lab par bhī

taḳhlīq ġhazal kar aisī ik ho shaad ki jis par yazdāñ bhī

mohtāt banāyā hogā unheñ hālāt ne apne ghar ke hī

ab apne hī ghar meñ rahte haiñ 'ḳhālid' jo ba-shakl-e-mehmāñ bhī

har mauj-e-hawadis rakhti hai sine mein bhanwar kuchh pinhan bhi

rahte hain muqabil hi aksar ishkal bhi dil mein iman bhi

shahron ki chamak ne aankhon ko dikhlae wo manzar jin ke liye

qadron ka taghayyur kya kahiye chhoD aae zaminen dahqan bhi

har samt larazti chiKHen hain jalte hue ghunchon, kaliyon ki

puchhe hai zamin-e-gul hum se kya kuchh hai ilaj-e-viran bhi

taKHliq-e-ajaib lakh hui fil-asr ye uqda apni jagah

ek harf-e-wafa ki qamat par ye 'ahd raha hai hairan bhi

thi soch ye manfi lagne lagi musbat bhi jo na'ra ban ke yahan

aazadi-e-niswan kah kah kar aurat ko kiya hai uryan bhi

is shahar-e-kasafat mein aa kar ojhal hue aankhon se manzar

wo ganw ka sabza wo bahr-o-bar wo dhup wo barq-o-baran bhi

ek 'ishq mein likh likh kar kaTa har lafz kitab-e-hasti ka

kar Dala usi ne zer-o-zabar jo kaam lage tha aasan bhi

gardish mein zamana hai har pal ummid pe duniya hai qaem

kal jin se the sahme sahme se ham, hain aaj wo larzan larzan bhi

asrar-e-zamana ban ban kar aate hain yahan din raat magar

fitrat ke masaib se ab tak haara hai kahan ye insan bhi

ho pae kisi ke hum bhi kahan yun koi hamara bhi na hua

kab Thahri kisi ek par bhi nazar kya chiz hai shahr-e-KHuban bhi

insan ka samajhna hai baqi, anjam ko pahunche hai duniya

ban jae farishta jab chahe ho jae ye aksar haiwan bhi

Darta hai dil-e-kam-fahm yahan kya jaaniye kya ho basti ka

rahte hain ab ahl-e-ulfat ke ham-rah ye nafrat-sazan bhi

aajiz hai ye insan apni hi sunai pe jab jab ghaur kare

hai farq numayan har ek mein phir bhi hai sabhi kuchh yaksan bhi

isbaat-e-tafakkur rakhta hai hum tum mein tawazun bhi lekin

rishton par paDi jab barf-ana kaam aae na 'ahd-o-paiman bhi

mear-e-adab bhi Thahre sada ho ahl-e-jahan ke lab par bhi

taKHliq ghazal kar aisi ek ho shad ki jis par yazdan bhi

mohtat banaya hoga unhen haalat ne apne ghar ke hi

ab apne hi ghar mein rahte hain 'KHalid' jo ba-shakl-e-mehman bhi