har mazhab be-ruh jasad hai jazbe ki qallashi hai

har maz.hab be-rūh jasad hai jazbe kī qallāshī hai

raakh ke tuude pūjte haiñ ye ka.aba hai vo kāshī hai

arsh kī qīl-o-qāl sunī afsāna-e-vajd-o-hāl sunā

zehn kī vo ayyāshī hai aur ruuh kī ye ayyāshī hai

dil murda maflūj haiñ rūheñ kaun jale aur kaun jalā.e

is ThanDe māhaul meñ bejā shauq kī aḳhgar-pāshī hai

haal dil-e-āshufta kā ai dair-o-haram kyā tum se kaheñ

vahshat har darbār se hai sahrā kī hāzir-bāshī hai

sāne-e-qudrat tere qalam kā kyā kahnā lekin ye batā

naqsh miTānā naqsh banānā ye kaisī naqqāshī hai

amn-o-sukūñ kā ye vaqfa marne kā ifāqa hai 'rizvī'

chehre par tahzīb-e-umam ke vaqtī ye bashshāshī hai

har mazhab be-ruh jasad hai jazbe ki qallashi hai

rakh ke tude pujte hain ye kaba hai wo kashi hai

arsh ki qil-o-qal suni afsana-e-wajd-o-haal suna

zehn ki wo ayyashi hai aur ruh ki ye ayyashi hai

dil murda mafluj hain ruhen kaun jale aur kaun jalae

is ThanDe mahaul mein beja shauq ki aKHgar-pashi hai

haal dil-e-ashufta ka ai dair-o-haram kya tum se kahen

wahshat har darbar se hai sahra ki hazir-bashi hai

sane-e-qudrat tere qalam ka kya kahna lekin ye bata

naqsh miTana naqsh banana ye kaisi naqqashi hai

amn-o-sukun ka ye waqfa marne ka ifaqa hai 'rizwi'

chehre par tahzib-e-umam ke waqti ye bashshashi hai