har naqsh-e-nawa lauT ke jaane ke liye tha

har naqsh-e-navā lauT ke jaane ke liye thā

jo bhuul chukā huuñ vo bhulāne ke liye thā

kuchh bhed zamāne ke bhī mujh par na khule the

kuchh maiñ bhī riyā-kār zamāne ke liye thā

kuchh maiñ ne bhī be-vaj.h hañsī us kī uḌaa.ī

kuchh vo bhī mirī jaan jalāne ke liye thā

kuchh log jazīroñ pe khaḌe the so khaḌe haiñ

sailāb safīnoñ ko bahāne ke liye thā

pyāsā jo na hotā to samundar se na miltā

dariyā jo mirī pyaas bujhāne ke liye thā

girnī hī thī ik roz ye dīvār badan kī

ye raah kā patthar bhī haTāne ke liye thā

sab merī udāsī meñ tujhe DhūñD rahe the

hañsnā bhī mirā tujh ko chhupāne ke liye thā

ik lahr ki bas ḳhaak uḌāne pe ba-zid thī

ik rañg ki palkoñ meñ sajāne ke liye thā

ik lamha-e-ḳhālī kī sadā sab ne sunī thī

ik shor ḳhamoshī ko baḌhāne ke liye thā

ḳhīra haiñ nigāheñ to na kuchh dekh sakeñgī

manzar jo yahāñ thā nazar aane ke liye thā

āp-apnī jasārat se tah-e-āb huā hai

vo Dūbne vaale ko bachāne ke liye thā

har naqsh-e-nawa lauT ke jaane ke liye tha

jo bhul chuka hun wo bhulane ke liye tha

kuchh bhed zamane ke bhi mujh par na khule the

kuchh main bhi riya-kar zamane ke liye tha

kuchh main ne bhi be-wajh hansi us ki uDai

kuchh wo bhi meri jaan jalane ke liye tha

kuchh log jaziron pe khaDe the so khaDe hain

sailab safinon ko bahane ke liye tha

pyasa jo na hota to samundar se na milta

dariya jo meri pyas bujhane ke liye tha

girni hi thi ek roz ye diwar badan ki

ye rah ka patthar bhi haTane ke liye tha

sab meri udasi mein tujhe DhunD rahe the

hansna bhi mera tujh ko chhupane ke liye tha

ek lahr ki bas KHak uDane pe ba-zid thi

ek rang ki palkon mein sajaane ke liye tha

ek lamha-e-KHali ki sada sab ne suni thi

ek shor KHamoshi ko baDhane ke liye tha

KHira hain nigahen to na kuchh dekh sakengi

manzar jo yahan tha nazar aane ke liye tha

aap-apni jasarat se tah-e-ab hua hai

wo Dubne wale ko bachane ke liye tha