ہر پل ترا خیال سرود خیال ہے

ہر پل ترا خیال سرود خیال ہے

سو چشم تر بھی آئینۂ عکس یار ہے

اس حیلہ جو کی یاد بھی اب رفتنی ہوئی

اک ہجر رہ گیا ہے سو وہ بے شمار ہے

بے خواب رت جگے کبھی اشکوں کے ہیں چراغ

ہے رفتگاں کا سوگ دل بے قرار ہے

ترک تعلقات کو گو مدتیں ہوئیں

اب بھی دل تباہ مگر سوگوار ہے

ہفت آسماں بھی لاکھ ترا پردہ دار ہو

ہر ذرہ کائنات کا تمثال دار ہے

موج طلسم شوق فریب گماں سہی

کیا کیجیے کہ دل کو ترا اعتبار ہے

کب رکھ سکی اسیر زمان و مکاں کی قید

انجمؔ نگار زیست تو مشت غبار ہے