har pari-wash ko KHuda taslim kar leta hun main

har parī-vash ko ḳhudā taslīm kar letā huuñ maiñ

kitnā saudā.ī huuñ kyā taslīm kar letā huuñ maiñ

mai chhuTī par gaahe gaahe ab bhī bahar-ehtirām

da.avat-e-āb-o-havā taslīm kar letā huuñ maiñ

be-vafā maiñ ne mohabbat se kahā thā aap ko

lījiye ab bā-vafā taslīm kar letā huuñ maiñ

jo añdherā terī zulfoñ kī tarah shādāb ho

us añdhere ko ziyā taslīm kar letā huuñ maiñ

jurm to koī nahīñ sarzad huā mujh se huzūr

bāvajūd us ke sazā taslīm kar letā huuñ maiñ

jab baġhair us ke na hotī ho ḳhalāsī ai 'adam'

rahzanoñ ko rahnumā taslīm kar letā huuñ maiñ

har pari-wash ko KHuda taslim kar leta hun main

kitna saudai hun kya taslim kar leta hun main

mai chhuTi par gahe gahe ab bhi bahar-ehtiram

dawat-e-ab-o-hawa taslim kar leta hun main

be-wafa main ne mohabbat se kaha tha aap ko

lijiye ab ba-wafa taslim kar leta hun main

jo andhera teri zulfon ki tarah shadab ho

us andhere ko ziya taslim kar leta hun main

jurm to koi nahin sarzad hua mujh se huzur

bawajud us ke saza taslim kar leta hun main

jab baghair us ke na hoti ho KHalasi ai 'adam'

rahzanon ko rahnuma taslim kar leta hun main