har qadam ek qayamat jahan bawar aae

har qadam ek qayāmat jahāñ bāvar aa.e

tere pīchhe to koī soch-samajh kar aa.e

mere showcase kī taqdīr sañvar saktī hai

kyā ye kam hai ki mire ghar tirā patthar aa.e

maiñ jinheñ mil na sakā vo to munāfiq hoñge

jin ko aanā thā mire dil meñ barābar aa.e

ho sake to bahā do ashk nadāmat vaale

ain mumkin hai ki vo shaḳhs palaT kar aa.e

ālam-e-vajd meñ aane to de ik baar mujhe

ek to kyā tirī tasvīr bhī chal kar aa.e

aglā mausam ho tabāhī kā ye mumkin hai miyāñ

ek muddat huī bastī meñ qalandar aa.e

ho gayā aaj ayaañ tere tasavvur kā tilism

dil kī dahlīz pe alfāz ke lashkar aa.e

koī 'āfāq' mohabbat kī himāyat meñ nahīñ

jaane kitne hī nishān us ke badan par aa.e

har qadam ek qayamat jahan bawar aae

tere pichhe to koi soch-samajh kar aae

mere showcase ki taqdir sanwar sakti hai

kya ye kam hai ki mere ghar tera patthar aae

main jinhen mil na saka wo to munafiq honge

jin ko aana tha mere dil mein barabar aae

ho sake to baha do ashk nadamat wale

ain mumkin hai ki wo shaKHs palaT kar aae

aalam-e-wajd mein aane to de ek bar mujhe

ek to kya teri taswir bhi chal kar aae

agla mausam ho tabahi ka ye mumkin hai miyan

ek muddat hui basti mein qalandar aae

ho gaya aaj ayan tere tasawwur ka tilism

dil ki dahliz pe alfaz ke lashkar aae

koi 'afaq' mohabbat ki himayat mein nahin

jaane kitne hi nishan us ke badan par aae