har qadam marhala-e-dar-o-salib aaj bhi hai

har qadam marhala-e-dār-o-salīb aaj bhī hai

jo kabhī thā vahī insāñ kā nasīb aaj bhī hai

jagmagāte haiñ ufuq par ye sitāre lekin

rāsta manzil-e-hastī kā muhīb aaj bhī hai

sar-e-maqtal jinheñ jaanā thā vo jā bhī pahuñche

sar-e-mimbar koī mohtāt ḳhatīb aaj bhī hai

ahl-e-dānish ne jise amr-e-musallam maanā

ahl-e-dil ke liye vo baat ajiib aaj bhī hai

ye tirī yaad hai yā merī aziyyat-koshī

ek nashtar sā rag-e-jāñ ke qarīb aaj bhī hai

kaun jaane ye tirā shā'ir-e-āshufta-mizāj

kitne maġhrūr ḳhudāoñ kā raqīb aaj bhī hai

har qadam marhala-e-dar-o-salib aaj bhi hai

jo kabhi tha wahi insan ka nasib aaj bhi hai

jagmagate hain ufuq par ye sitare lekin

rasta manzil-e-hasti ka muhib aaj bhi hai

sar-e-maqtal jinhen jaana tha wo ja bhi pahunche

sar-e-mimbar koi mohtat KHatib aaj bhi hai

ahl-e-danish ne jise amr-e-musallam mana

ahl-e-dil ke liye wo baat ajib aaj bhi hai

ye teri yaad hai ya meri aziyyat-koshi

ek nashtar sa rag-e-jaan ke qarib aaj bhi hai

kaun jaane ye tera sha'ir-e-ashufta-mizaj

kitne maghrur KHudaon ka raqib aaj bhi hai