har rang-e-tarab mausam o manzar se nikala

har rañg-e-tarab mausam o manzar se nikālā

ik rāsta phir sa.ī-e-mukarrar se nikālā

chalne lagī har samt se jab bād-e-ḳhush-āsār

ik aur bhañvar ham ne samundar se nikālā

detī rahī āvāz pe āvāz ye duniyā

sar ham ne na phir ḳhaak kī chādar se nikālā

kam paḌ ga.ī parvāz ko jab vus.at-e-aflāk

ik aur falak apne hī shahpar se nikālā

ham dil se rahe tez havāoñ ke muḳhālif

jab tham gayā tūfāñ to qadam ghar se nikālā

ab kaifiyat o rañg nazar aa.ī jo duniyā

mausam nayā phir apne hī andar se nikālā

āsār nazar aa.e na sairābī-e-dil ke

thak-hār ke saudā-e-numū sar se nikālā

har rang-e-tarab mausam o manzar se nikala

ek rasta phir sai-e-mukarrar se nikala

chalne lagi har samt se jab baad-e-KHush-asar

ek aur bhanwar hum ne samundar se nikala

deti rahi aawaz pe aawaz ye duniya

sar hum ne na phir KHak ki chadar se nikala

kam paD gai parwaz ko jab wusat-e-aflak

ek aur falak apne hi shahpar se nikala

hum dil se rahe tez hawaon ke muKHalif

jab tham gaya tufan to qadam ghar se nikala

ab kaifiyat o rang nazar aai jo duniya

mausam naya phir apne hi andar se nikala

aasar nazar aae na sairabi-e-dil ke

thak-haar ke sauda-e-numu sar se nikala