har sahib-e-jamal ke dil ka makin hai

har sāhib-e-jamāl ke dil kā makīn hai

mahfil meñ ek shaḳhs jo gosha-nashīn hai

suuī bhī DhūñD laa.ī hai dhāgā bhī fārehā

aur jaun hai ki apnī hī duniyā meñ liin hai

duniyā hamāre biich muallaq hai is tarah

jis tarah ain-o-qāf ke mābain shiin hai

farhād kār-ḳhāne meñ teshe galātā hai

aur qais apne shahr meñ sab se zahīn hai

jis ke liye banā hai usī kaam kā nahīñ

insān apne vaqt kī bigḌī machine hai

maiñ aazmā to luuñ mire kuchh dostoñ ko par

kuchh dostoñ kā ghar hī mirī āstīn hai

jo terā ho gayā vo kisī kā nahīñ huā

ai maut bil-yaqīn tū behad hasīn hai

ik aarzū kā jism abhī bhī havā meñ hai

aur ek aarzū hai jo zer-e-zamīn hai

jo tujh ko chāhte haiñ unheñ chāhtā huuñ maiñ

mujh ko yahī sikhāyā gayā hai ye diin hai

tum kyā kisī bahār meñ 'shādāb' ho sake

tum jhuuT bolte the ki mausam hasīn hai

har sahib-e-jamal ke dil ka makin hai

mahfil mein ek shaKHs jo gosha-nashin hai

sui bhi DhunD lai hai dhaga bhi fareha

aur jaun hai ki apni hi duniya mein lin hai

duniya hamare bich muallaq hai is tarah

jis tarah ain-o-qaf ke mabain shin hai

farhad kar-KHane mein teshe galata hai

aur qais apne shahr mein sab se zahin hai

jis ke liye bana hai usi kaam ka nahin

insan apne waqt ki bigDi machine hai

main aazma to lun mere kuchh doston ko par

kuchh doston ka ghar hi meri aastin hai

jo tera ho gaya wo kisi ka nahin hua

ai maut bil-yaqin tu behad hasin hai

ek aarzu ka jism abhi bhi hawa mein hai

aur ek aarzu hai jo zer-e-zamin hai

jo tujh ko chahte hain unhen chahta hun main

mujh ko yahi sikhaya gaya hai ye din hai

tum kya kisi bahaar mein 'shadab' ho sake

tum jhuT bolte the ki mausam hasin hai