har sahar rangīñ-navā har shaam ḳhush-āhang hai
ye javānī hai ki firdaus-e-rabāb-o-chang hai
jaur-e-paiham se ta.ajjub ke agar dil tang hai
vo hañsī jo had se baḌh jaa.e payām-e-jang hai
ye ḳhabar bhī ai asīr-e-jalva-e-sad-rang hai
dil ke ā.īne ko aks-e-lāla-o-gul-rang hai
ahd ahd-e-nā-tavāñ har uzr uzr-e-lang hai
kyā yahī tahzīb-e-sham.a-e-mahfil-e-afrañg hai
tum nahīñ to ik dil-e-maġhmūm par kyā munhasir
har gul-e-firdaus tasvīr-e-shikasta-rang hai
vo agar sho.ala-zan-e-dil hoñ to husn-e-iltifāt
dil agar shikva-kun-e-soz-e-darūñ ho nang hai
kyā harīf-e-sohbat-e-begāna ho tab.a-e-latīf
sīna-e-shabnam pe barg-e-sabza-e-tar sang hai
vo shikast-e-dil jo ho marhūn-e-zarb-e-zikr-e-dost
jazb-o-mastī ko sarosh-e-sāz-e-ḳhush-āhang hai
lauh-e-hastī par nahīñ ik shai bhī marfū'-ul-qalam
nuqta-e-sahv is jagah nuqta nahīñ farhang hai
ḳhatra-e-rahzan se baḌh kar ho jahāñ ehsān-e-ḳhizr
ik qadam is jāda-e-ulfat meñ sau farsang hai
kaash vo phir hoñ rahīn-e-kāvish-e-qat'a-o-burīd
go qabā-e-zindagī rangīñ hai lekin tang hai
ḳhanda-e-gul ho rahīn-e-girya-e-shabnam jahāñ
vo jahān-e-rang-o-bū bhī 'faiz' ik nairang hai
har sahar rangin-nawa har sham KHush-ahang hai
ye jawani hai ki firdaus-e-rabab-o-chang hai
jaur-e-paiham se tajjub ke agar dil tang hai
wo hansi jo had se baDh jae payam-e-jang hai
ye KHabar bhi ai asir-e-jalwa-e-sad-rang hai
dil ke aaine ko aks-e-lala-o-gul-rang hai
ahd ahd-e-na-tawan har uzr uzr-e-lang hai
kya yahi tahzib-e-shama-e-mahfil-e-afrang hai
tum nahin to ek dil-e-maghmum par kya munhasir
har gul-e-firdaus taswir-e-shikasta-rang hai
wo agar shoala-zan-e-dil hon to husn-e-iltifat
dil agar shikwa-kun-e-soz-e-darun ho nang hai
kya harif-e-sohbat-e-begana ho taba-e-latif
sina-e-shabnam pe barg-e-sabza-e-tar sang hai
wo shikast-e-dil jo ho marhun-e-zarb-e-zikr-e-dost
jazb-o-masti ko sarosh-e-saz-e-KHush-ahang hai
lauh-e-hasti par nahin ek shai bhi marfu'-ul-qalam
nuqta-e-sahw is jagah nuqta nahin farhang hai
KHatra-e-rahzan se baDh kar ho jahan ehsan-e-KHizr
ek qadam is jada-e-ulfat mein sau farsang hai
kash wo phir hon rahin-e-kawish-e-qat'a-o-burid
go qaba-e-zindagi rangin hai lekin tang hai
KHanda-e-gul ho rahin-e-girya-e-shabnam jahan
wo jahan-e-rang-o-bu bhi 'faiz' ek nairang hai
Source:
Aabshar (Pg. 189)
-
Author:
Faiz Jhanjhanvi
-
- Publisher: Urdu Majlis, Delhi
- Year of Publication: 1944
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.