har samt ye hum shor-o-sharar dekh rahe hain

har samt ye ham shor-o-sharar dekh rahe haiñ

mazlūm kī aahoñ kā asar dekh rahe haiñ

miTte hue aslāf kī azmat ke nishānāt

dekhe nahīñ jaate haiñ magar dekh rahe haiñ

kal tak jo uḳhuvvat ke liye phirte the parcham

badlī huī aaj un kī nazar dekh rahe haiñ

arbāb-e-hukūmat meñ hai jahl aur taġhāful

tārāj huā jaatā hai ghar dekh rahe haiñ

jamhūrī hukūmat jise samjhe the parī ham

ifrīt kī sūrat hai jidhar dekh rahe haiñ

kyā baaġh dikhā.e ga.e āzādī se pahle

kis darja mile talḳh samar dekh rahe haiñ

sab ahl-e-vafā ho ga.e kangāl 'ġhubār' aaj

nā-ahloñ ke ghar la.al-o-gohar dekh rahe haiñ

har samt ye hum shor-o-sharar dekh rahe hain

mazlum ki aahon ka asar dekh rahe hain

miTte hue aslaf ki azmat ke nishanat

dekhe nahin jate hain magar dekh rahe hain

kal tak jo uKHuwwat ke liye phirte the parcham

badli hui aaj un ki nazar dekh rahe hain

arbab-e-hukumat mein hai jahl aur taghaful

taraj hua jata hai ghar dekh rahe hain

jamhuri hukumat jise samjhe the pari hum

ifrit ki surat hai jidhar dekh rahe hain

kya bagh dikhae gae aazadi se pahle

kis darja mile talKH samar dekh rahe hain

sab ahl-e-wafa ho gae kangal 'ghubar' aaj

na-ahlon ke ghar lal-o-gohar dekh rahe hain