har samt zindagi ka tamasha bhi KHub hai

har samt zindagī kā tamāshā bhī ḳhuub hai

duniyā bhī ḳhuub raunaq-e-duniyā bhī ḳhuub hai

jis shahr meñ kisī ko kisī kī ḳhabar nahīñ

us shahr-e-lā-javāb meñ jiinā bhī ḳhuub hai

mai-ḳhāna-e-hayāt kā ahvāl kyā likhūñ

saaqī bhī ḳhuub sāġhar-e-sahbā bhī ḳhuub hai

pī kar sharāb gum maiñ rahūñ apne hosh meñ

ai zindagī ye terā taqāzā bhī ḳhuub hai

dekhā hai maiñ ne us ke ziyāñ meñ bhī fā.eda

bāzār-e-ārzū kā ḳhasārā bhī ḳhuub hai

hotī hai avvalīñ hī mulāqāt-e-āḳhirī

insān kā ye maut se rishta bhī ḳhuub hai

muddat se chal rahā huuñ magar tai na kar sakā

'shāhid' ye rāh-e-rāst tamannā bhī ḳhuub hai

har samt zindagi ka tamasha bhi KHub hai

duniya bhi KHub raunaq-e-duniya bhi KHub hai

jis shahr mein kisi ko kisi ki KHabar nahin

us shahr-e-la-jawab mein jina bhi KHub hai

mai-KHana-e-hayat ka ahwal kya likhun

saqi bhi KHub saghar-e-sahba bhi KHub hai

pi kar sharab gum main rahun apne hosh mein

ai zindagi ye tera taqaza bhi KHub hai

dekha hai main ne us ke ziyan mein bhi faeda

bazar-e-arzu ka KHasara bhi KHub hai

hoti hai awwalin hi mulaqat-e-aKHiri

insan ka ye maut se rishta bhi KHub hai

muddat se chal raha hun magar tai na kar saka

'shahid' ye rah-e-rast tamanna bhi KHub hai