har shab-e-gham ki sahar bhi hogi

har shab-e-ġham kī sahar bhī hogī

zindagī hai to basar bhī hogī

vo zamāna bhī kabhī aa.egā

dil kī jab dil ko ḳhabar bhī hogī

dard kam-kam nahīñ afzūñ hogā

chashm pur-nam nahīñ tar bhī hogī

ātish-e-ishq jise kahte haiñ

vo idhar hai to udhar bhī hogī

zulm hī zulm na hogā āḳhir

pyaar kī ek nazar bhī hogī

maiñ ḳhatā-kār-e-nazar huuñ lekin

ye ḳhatā bār-e-digar bhī hogī

kitne vo ahl-e-nazar haiñ jin kī

husn-e-ma.anī pe nazar bhī hogī

jaane kyā haal hamārā hogā

jab mohabbat kī nazar bhī hogī

ham bhī hoñge tirā ġham bhī hogā

shab bhī aa.egī sahar bhī hogī

jalva-e-ġhuncha-o-gul bhī hogā

shoḳhī-e-barq-o-sharar bhī hogī

azm bebāk safar bhī hogā

raah pur-ḳhauf-o-ḳhatar bhī hogī

har aziyyat hī muqaddar hai agar

dasht to dasht hai ghar bhī hogī

bach rahī aaj havādis se agar

har kalī kal gul-e-tar bhī hogī

rañj rāhat meñ badal jā.egā

ḳhair dar-parda-e-shar bhī hogī

kuchh sitāre bhī daraḳhshāñ hoñge

kuchh mirī gard-e-safar bhī hogī

har shab-e-gham ki sahar bhi hogi

zindagi hai to basar bhi hogi

wo zamana bhi kabhi aaega

dil ki jab dil ko KHabar bhi hogi

dard kam-kam nahin afzun hoga

chashm pur-nam nahin tar bhi hogi

aatish-e-ishq jise kahte hain

wo idhar hai to udhar bhi hogi

zulm hi zulm na hoga aaKHir

pyar ki ek nazar bhi hogi

main KHata-kar-e-nazar hun lekin

ye KHata bar-e-digar bhi hogi

kitne wo ahl-e-nazar hain jin ki

husn-e-mani pe nazar bhi hogi

jaane kya haal hamara hoga

jab mohabbat ki nazar bhi hogi

hum bhi honge tera gham bhi hoga

shab bhi aaegi sahar bhi hogi

jalwa-e-ghuncha-o-gul bhi hoga

shoKHi-e-barq-o-sharar bhi hogi

azm bebak safar bhi hoga

rah pur-KHauf-o-KHatar bhi hogi

har aziyyat hi muqaddar hai agar

dasht to dasht hai ghar bhi hogi

bach rahi aaj hawadis se agar

har kali kal gul-e-tar bhi hogi

ranj rahat mein badal jaega

KHair dar-parda-e-shar bhi hogi

kuchh sitare bhi daraKHshan honge

kuchh meri gard-e-safar bhi hogi