har shaKHs ko aise dekhta hun

har shaḳhs ko aise dekhtā huuñ

jaise kahīñ duur jā rahā huuñ

dekhī hī nahīñ ḳhizāñ kī sūrat

kis gulshan-e-shauq kī havā huuñ

ḳhud apnī nigāh se huuñ rū-posh

aa.ina huuñ jahāñ-numā huuñ

be-nūr huī haiñ jab se āñkheñ

aa.ine talāsh kar rahā huuñ

nā-qadr-shanās jauharī ko

rāhoñ meñ paḌā huā milā huuñ

jab raat kī zulf bhīgtī hai

sannāTe kī tarah gūñjtā huuñ

is daur-e-ḳhizāñ-nasīb meñ bhī

kaliyāñ sī khilā khilā gayā huuñ

āñkhoñ meñ vahshateñ rachī haiñ

ḳhvāboñ meñ bhī ḳhaak chhāntā huuñ

hai chehra jo daaġh daaġh apnā

har aa.ine se ḳhafā ḳhafā huuñ

talvār pe raqs kā natīja

jab paañv kaTe to sochtā huuñ

parda-e-sabā na ḳhauf-e-sarsar

ḳhākistar-e-yās par khilā huuñ

har shaKHs ko aise dekhta hun

jaise kahin dur ja raha hun

dekhi hi nahin KHizan ki surat

kis gulshan-e-shauq ki hawa hun

KHud apni nigah se hun ru-posh

aaina hun jahan-numa hun

be-nur hui hain jab se aankhen

aaine talash kar raha hun

na-qadr-shanas jauhari ko

rahon mein paDa hua mila hun

jab raat ki zulf bhigti hai

sannaTe ki tarah gunjta hun

is daur-e-KHizan-nasib mein bhi

kaliyan si khila khila gaya hun

aankhon mein wahshaten rachi hain

KHwabon mein bhi KHak chhanta hun

hai chehra jo dagh dagh apna

har aaine se KHafa KHafa hun

talwar pe raqs ka natija

jab panw kaTe to sochta hun

parda-e-saba na KHauf-e-sarsar

KHakistar-e-yas par khila hun