har taraf shor hai mani chaman-arai hai

har taraf shor hai 'mānī' chaman-ārā.ī hai

tū bhī phir dars-e-fuġhāñ de ki bahār aa.ī hai

be-talab sab ne yahāñ dād-e-sitam paa.ī hai

hashr hai naala na karne meñ bhī rusvā.ī hai

vāqa.ī kuchh nahīñ yā kuchh nazar aatā hī nahīñ

dil-e-mahjūr ye zulmat hai ki tanhā.ī hai

mudda.ā mere junūñ kā to hai tahsīn-e-bahār

aur duniyā ye samajhtī hai ki saudā.ī hai

āstāñ jazb-e-jabīñ hai magar ai fitrat-e-ishq

maiñ huuñ aur hausla-e-nāsiya-farsā.ī hai

aa ki imdād-e-tasavvur se bhī mahrūm huuñ ab

aur dil sajda-e-āḳhir kā tamannā.ī hai

sab rahe sirf badaltā rahā mahfil kā nizām

tū hai aur silsila-e-anjuman-ārā.ī hai

saare aalam kī raqābat kā junūñ hai mujh ko

aur buniyād-e-junūñ aap kī yaktā.ī hai

tū bhī hai un ke liye manzar-e-ibrat 'mānī'

jin kā yuuñ dīda-e-hasrat se tamāshā.ī hai

har taraf shor hai 'mani' chaman-arai hai

tu bhi phir dars-e-fughan de ki bahaar aai hai

be-talab sab ne yahan dad-e-sitam pai hai

hashr hai nala na karne mein bhi ruswai hai

waqai kuchh nahin ya kuchh nazar aata hi nahin

dil-e-mahjur ye zulmat hai ki tanhai hai

muddaa mere junun ka to hai tahsin-e-bahaar

aur duniya ye samajhti hai ki saudai hai

aastan jazb-e-jabin hai magar ai fitrat-e-ishq

main hun aur hausla-e-nasiya-farsai hai

aa ki imdad-e-tasawwur se bhi mahrum hun ab

aur dil sajda-e-aKHir ka tamannai hai

sab rahe sirf badalta raha mahfil ka nizam

tu hai aur silsila-e-anjuman-arai hai

sare aalam ki raqabat ka junun hai mujh ko

aur buniyaad-e-junun aap ki yaktai hai

tu bhi hai un ke liye manzar-e-ibrat 'mani'

jin ka yun dida-e-hasrat se tamashai hai