har taraf uske sunahre lafz hain phaile hue

har taraf us ke sunahre lafz haiñ phaile hue

aur ham kājal kī ik tahrīr meñ Duube hue

chāñdnī ke shahr meñ hamrāh thā vo bhī magar

duur tak ḳhāmoshiyoñ ke saaz the bajte hue

hañs rahā thā vo harī rut kī suhānī chhāñv meñ

daf'atan har ik shajar ke pairahan maile hue

aaj ik mā'sūm bachchī kī zabāñ khīñchī ga.ī

merī bastī meñ añdhere aur bhī gahre hue

har galī meñ thiiñ siyah parchhā.iyoñ kī yūrisheñ

shab ka.ī gūñge malak har chhat pe the baiThe hue

sab adā.eñ vaqt kī vo jāntā hai is liye

TaaT ke nīche sunahrā taaj hai rakkhe hue

soup ke daane kabūtar chug rahā thā aur vo

sahn ko mahkā rahī thī sunnateñ paḌhte hue

raat 'ambar' kahkashāñ se duub ye kahne lagī

chhāñv meñ merī hazāroñ chāñd haiñ so.e hue

har taraf us ke sunahre lafz hain phaile hue

aur hum kajal ki ek tahrir mein Dube hue

chandni ke shahr mein hamrah tha wo bhi magar

dur tak KHamoshiyon ke saz the bajte hue

hans raha tha wo hari rut ki suhani chhanw mein

daf'atan har ek shajar ke pairahan maile hue

aaj ek ma'sum bachchi ki zaban khinchi gai

meri basti mein andhere aur bhi gahre hue

har gali mein thin siyah parchhaiyon ki yurishen

shab kai gunge malak har chhat pe the baiThe hue

sab adaen waqt ki wo jaanta hai is liye

TaT ke niche sunahra taj hai rakkhe hue

soup ke dane kabutar chug raha tha aur wo

sahn ko mahka rahi thi sunnaten paDhte hue

raat 'ambar' kahkashan se dub ye kahne lagi

chhanw mein meri hazaron chand hain soe hue