har-waqt ulajhta hai ye dil zulf-e-duta mein

har-vaqt ulajhtā hai ye dil zulf-e-dutā meñ

samjhātā huuñ kam-baḳht na paḌ jā ke balā meñ

dekho na kabhī ḳhū-e-sitam apnī badalnā

miltā hai mazā ham ko bahut jaur-o-jafā meñ

kis lutf se ayyām guzarte haiñ hamāre

din nāla-o-fariyād meñ shab āh-o-bukā meñ

miTTī huī barbād tire 'ishq meñ aisī

kuchh ḳhaak ke zarre nazar aate haiñ havā meñ

kyuuñ chal diye mai-ḳhāne se ai shaiḳh Thaharnā

poshīda nazar aatā hai kuchh aaj abā meñ

kahtī hai ye tauba ki gunahgār maiñ behtar

ai dil kabhī bhūle se bhī paḌnā na riyā meñ

kar duuñ shab-e-furqat kā bayāñ hashr meñ lekin

Dartā huuñ tavālat na paḌe roz-e-jazā meñ

marnā jise kahte haiñ vo hai ziist kā āġhāz

miltī hai baqā sab ko isī rāh-e-fanā meñ

kis ke liye allāh ne jannat ko banāyā

bande to yahāñ rahte haiñ har vaqt ḳhatā meñ

maqbūl huī hashr meñ gar merī ḳhajālat

mil jā.egī jannat bhī gunāhoñ kī sazā meñ

vā'iz kahe kuchh bhī hameñ mā'lūm hai yārab

sau ḳhuld haiñ poshīda tirī ek razā meñ

hil jaatī hai duniyā mirī fariyād se 'hāfiz'

tāsīr ġhazab kī hai mirī āh-e-rasā meñ

har-waqt ulajhta hai ye dil zulf-e-duta mein

samjhata hun kam-baKHt na paD ja ke bala mein

dekho na kabhi KHu-e-sitam apni badalna

milta hai maza hum ko bahut jaur-o-jafa mein

kis lutf se ayyam guzarte hain hamare

din nala-o-fariyaad mein shab aah-o-buka mein

miTTi hui barbaad tere 'ishq mein aisi

kuchh KHak ke zarre nazar aate hain hawa mein

kyun chal diye mai-KHane se ai shaiKH Thaharna

poshida nazar aata hai kuchh aaj aba mein

kahti hai ye tauba ki gunahgar main behtar

ai dil kabhi bhule se bhi paDna na riya mein

kar dun shab-e-furqat ka bayan hashr mein lekin

Darta hun tawalat na paDe roz-e-jaza mein

marna jise kahte hain wo hai zist ka aaghaz

milti hai baqa sab ko isi rah-e-fana mein

kis ke liye allah ne jannat ko banaya

bande to yahan rahte hain har waqt KHata mein

maqbul hui hashr mein gar meri KHajalat

mil jaegi jannat bhi gunahon ki saza mein

wa'iz kahe kuchh bhi hamein ma'lum hai yarab

sau KHuld hain poshida teri ek raza mein

hil jati hai duniya meri fariyaad se 'hafiz'

tasir ghazab ki hai meri aah-e-rasa mein