haram kahta hai kuchh dair-e-butan kuchh aur kahta hai

haram kahtā hai kuchh dair-e-butāñ kuchh aur kahtā hai

tarīq-e-manzil-e-vāraftgāñ kuchh aur kahtā hai

har ik se un kā vahshī dāstāñ kuchh aur kahtā hai

nahīñ hotā jahāñ koī vahāñ kuchh aur kahtā hai

amīr-e-kārvāñ kyā hai ḳhudā-e-kārvāñ ham the

magar ab to ġhubār-e-kārvāñ kuchh aur kahtā hai

har ik jalve meñ ik parda har ik parda meñ ik jalva

ba-har-sūrat sahāb-e-darmiyāñ kuchh aur kahtā hai

janāb-e-shaiḳh ke lab par ḳhudā kā naam aatā hai

subūhī-kash magar vaqt-e-azāñ kuchh aur kahtā hai

ye maanā jannat-e-husn-e-nazar thī zindagī apnī

magar ḳhamyāza-e-umr-e-ravāñ kuchh aur kahtā hai

mirī hastī kā har zarra hai gunjā.ish-talab ab tak

ki pā kar vus.at-e-kaun-o-makāñ kuchh aur kahtā hai

qafas meñ laakh sāmān-e-tarab sayyād hai lekin

mirā naala ba-nām-e-āshiyāñ kuchh aur kahtā hai

nahīñ hotī hai hujjat ḳhatm tanhā āb-o-dāna par

are sayyād asīr-e-be-zabāñ kuchh aur kahtā hai

utārī jā rahī haiñ qaidiyoñ kī beḌiyāñ lekin

nishān-e-halqa-e-tauq-e-garāñ kuchh aur kahtā hai

ajab uljhan meñ Daalā tū ne o muñh pherne vaale

ki dil kuchh aur kahtā hai gumāñ kuchh aur kahtā hai

mirā har ek sajda muntazir hai qaul-e-faisal kā

jabīñ kuchh kah rahī hai āstāñ kuchh aur kahtā hai

kalām-e-'mīr'-o-'mirzā' qābil-e-sad-nāz hai 'afqar'

magar 'momin' kā andāz-e-bayāñ kuchh aur kahtā hai

haram kahta hai kuchh dair-e-butan kuchh aur kahta hai

tariq-e-manzil-e-waraftgan kuchh aur kahta hai

har ek se un ka wahshi dastan kuchh aur kahta hai

nahin hota jahan koi wahan kuchh aur kahta hai

amir-e-karwan kya hai KHuda-e-karwan hum the

magar ab to ghubar-e-karwan kuchh aur kahta hai

har ek jalwe mein ek parda har ek parda mein ek jalwa

ba-har-surat sahab-e-darmiyan kuchh aur kahta hai

janab-e-shaiKH ke lab par KHuda ka nam aata hai

subuhi-kash magar waqt-e-azan kuchh aur kahta hai

ye mana jannat-e-husn-e-nazar thi zindagi apni

magar KHamyaza-e-umr-e-rawan kuchh aur kahta hai

meri hasti ka har zarra hai gunjaish-talab ab tak

ki pa kar wusat-e-kaun-o-makan kuchh aur kahta hai

qafas mein lakh saman-e-tarab sayyaad hai lekin

mera nala ba-nam-e-ashiyan kuchh aur kahta hai

nahin hoti hai hujjat KHatm tanha aab-o-dana par

are sayyaad asir-e-be-zaban kuchh aur kahta hai

utari ja rahi hain qaidiyon ki beDiyan lekin

nishan-e-halqa-e-tauq-e-garan kuchh aur kahta hai

ajab uljhan mein Dala tu ne o munh pherne wale

ki dil kuchh aur kahta hai guman kuchh aur kahta hai

mera har ek sajda muntazir hai qaul-e-faisal ka

jabin kuchh kah rahi hai aastan kuchh aur kahta hai

kalam-e-'mir'-o-'mirza' qabil-e-sad-naz hai 'afqar'

magar 'momin' ka andaz-e-bayan kuchh aur kahta hai