hare-bhare use watawaran mein rakkha hai

hare-bhare use vātāvaran meñ rakkhā hai

bahut hasīn hai vo jis ko man meñ rakkhā hai

parā.e des meñ rahte haiñ ik zamāne se

hamārā dil magar ab bhī vatan meñ rakkhā hai

tumhārī yādeñ mire dil meñ aise rahtī haiñ

ki jaise ghī ko kisī ne havan meñ rakkhā hai

batā de is se bhī baḌh kar maqām hai koī

ai merī jaañ tujhe dil ke bhavan meñ rakkhā hai

divāna bazm meñ har shaḳhs ho gayā un kā

na jaane kaun sā jaadū nayan meñ rakkhā hai

bas ek miTTī kā putlā har ek insāñ hai

tū sochtā hai bahut kuchh badan meñ rakkhā hai

na DhūñD ab kisī dil meñ 'sirāj-manzar’ ko

dil-e-'sirāj' to maañ ke charan meñ rakkhā hai

hare-bhare use watawaran mein rakkha hai

bahut hasin hai wo jis ko man mein rakkha hai

parae des mein rahte hain ek zamane se

hamara dil magar ab bhi watan mein rakkha hai

tumhaari yaaden mere dil mein aise rahti hain

ki jaise ghi ko kisi ne hawan mein rakkha hai

bata de is se bhi baDh kar maqam hai koi

ai meri jaan tujhe dil ke bhawan mein rakkha hai

diwana bazm mein har shaKHs ho gaya un ka

na jaane kaun sa jadu nayan mein rakkha hai

bas ek miTTi ka putla har ek insan hai

tu sochta hai bahut kuchh badan mein rakkha hai

na DhunD ab kisi dil mein 'siraj-manzar’ ko

dil-e-'siraj' to man ke charan mein rakkha hai