hare patto sunahri dhup ki qurbat mein KHush rahna

hare patto sunahrī dhuup kī qurbat meñ ḳhush rahnā

magar mumkin nahīñ hai ek sī hālat meñ ḳhush rahnā

magan rahte haiñ ye būḌhe shajar apnī kathāoñ meñ

unheñ aatā hai apne zehn kī jannat meñ ḳhush rahnā

ham insānoñ ko phir jiine kā maqsad hī nahīñ miltā

likhā hotā jo us ne sab kī hī qismat meñ ḳhush rahnā

ye aañsū chaar din ke haiñ ye aañsū suukh jā.eñge

sikhā deñge tumheñ hālāt har sūrat meñ ḳhush rahnā

maiñ apne zaḳhm aksar is liye bhī noch letā huuñ

kahīñ shāmil na ho jaa.e mirī aadat meñ ḳhush rahnā

sukūn-e-dil gañvā baiThoge tum fitrat se laḌne meñ

jo chāho āfiyat apne qad-o-qāmat meñ ḳhush rahnā

pukārā 'umr ko ḳhushiyoñ ne jab masrūf the behad

samay se siikh lete kaash ham fursat meñ ḳhush rahnā

hare patto sunahri dhup ki qurbat mein KHush rahna

magar mumkin nahin hai ek si haalat mein KHush rahna

magan rahte hain ye buDhe shajar apni kathaon mein

unhen aata hai apne zehn ki jannat mein KHush rahna

hum insanon ko phir jine ka maqsad hi nahin milta

likha hota jo us ne sab ki hi qismat mein KHush rahna

ye aansu chaar din ke hain ye aansu sukh jaenge

sikha denge tumhein haalat har surat mein KHush rahna

main apne zaKHm aksar is liye bhi noch leta hun

kahin shamil na ho jae meri aadat mein KHush rahna

sukun-e-dil ganwa baiThoge tum fitrat se laDne mein

jo chaho aafiyat apne qad-o-qamat mein KHush rahna

pukara 'umr ko KHushiyon ne jab masruf the behad

samay se sikh lete kash hum fursat mein KHush rahna