harf raushan the numayan dard ki tahrir thi

harf raushan the numāyāñ dard kī tahrīr thī

us kā chehra thā ki mere karb kī tafsīr thī

kuchh mirī āñkhoñ meñ bhī thā Dūbte rañgoñ kā aks

us ghaḌī vo mohnī sūrat bhī kuchh dil-gīr thī

an-ginat hissoñ meñ yuuñ taqsīm ho kar rah ga.ī

zindagī jaise mire ajdād kī jāgīr thī

haath phailā.e khaḌī thī jo bhare bāzār meñ

vo mire iflās kī muñh boltī tasvīr thī

dekhtī thī aane vaalī sub.h-e-nau kā rāsta

muntazir zindān-e-shab meñ duḳhtar-e-kashmīr thī

pūjtī thī har na.ī sūrat ko āvāra nazar

garche paaoñ meñ muqaddas ahd kī zanjīr thī

ik parinda par-shikasta aur suunā rāsta

kis qadar sachchī mire hālāt kī tasvīr thī

harf raushan the numayan dard ki tahrir thi

us ka chehra tha ki mere karb ki tafsir thi

kuchh meri aankhon mein bhi tha Dubte rangon ka aks

us ghaDi wo mohni surat bhi kuchh dil-gir thi

an-ginat hisson mein yun taqsim ho kar rah gai

zindagi jaise mere ajdad ki jagir thi

hath phailae khaDi thi jo bhare bazar mein

wo mere iflas ki munh bolti taswir thi

dekhti thi aane wali subh-e-nau ka rasta

muntazir zindan-e-shab mein duKHtar-e-kashmir thi

pujti thi har nai surat ko aawara nazar

garche paon mein muqaddas ahd ki zanjir thi

ek parinda par-shikasta aur suna rasta

kis qadar sachchi mere haalat ki taswir thi