harif aae to us ka bhi ghar nikala jae

harīf aa.e to us kā bhī ghar nikālā jaa.e

shikār-gāh se ab ke na sar nikālā jaa.e

shikast-e-fāsh kā tūfān sar pe aa pahuñchā

bisāt kā hai taqāzā ki ghar nikālā jaa.e

zabān-e-vaqt ko dī jaa.e ik na.ī lazzat

zamīn se samar-e-be-shajar nikālā jaa.e

tahī hai dāman-e-abr-e-atā to yuuñ kar leñ

ḳhazaf nichoḌ ke āb-e-guhar nikālā jaa.e

bahut ajiib hai us kī ye shart-e-ham-safarī

miyān-e-rāh na raḳht-e-safar nikālā jaa.e

qalam kī pyaas bujhānī bahut zarūrī hai

kisī pe ḳhanjar-e-zahrāb-asar nikālā jaa.e

bahut dinoñ se jalāyā nahīñ gayā hai charāġh

ye qarz hai to har ik baam par nikālā jaa.e

na-jāne kab se sharar-āshnā hai dasht-e-jamāl

chalo ki hausla-e-chashm-e-tar nikālā jaa.e

chalāyā jaa.e dil-e-sang par jo teshā-e-fan

koī sipās-guzār-e-hunar nikālā jaa.e

ye daur vo hai ki 'yāvar' zabān hī na rahe

jo ek harf sar-e-rah-guzar nikālā jaa.e

harif aae to us ka bhi ghar nikala jae

shikar-gah se ab ke na sar nikala jae

shikast-e-fash ka tufan sar pe aa pahuncha

bisat ka hai taqaza ki ghar nikala jae

zaban-e-waqt ko di jae ek nai lazzat

zamin se samar-e-be-shajar nikala jae

tahi hai daman-e-abr-e-ata to yun kar len

KHazaf nichoD ke aab-e-guhar nikala jae

bahut ajib hai us ki ye shart-e-ham-safari

miyan-e-rah na raKHt-e-safar nikala jae

qalam ki pyas bujhani bahut zaruri hai

kisi pe KHanjar-e-zahrab-asar nikala jae

bahut dinon se jalaya nahin gaya hai charagh

ye qarz hai to har ek baam par nikala jae

na-jaane kab se sharar-ashna hai dasht-e-jamal

chalo ki hausla-e-chashm-e-tar nikala jae

chalaya jae dil-e-sang par jo tesha-e-fan

koi sipas-guzar-e-hunar nikala jae

ye daur wo hai ki 'yawar' zaban hi na rahe

jo ek harf sar-e-rah-guzar nikala jae