harif-e-waqt hun sab se juda hai rah meri

harīf-e-vaqt huuñ sab se judā hai raah mirī

na qasr-e-shāh se nisbat na ḳhānqāh mirī

kisī se koī ta.alluq na rasm-o-rāh mirī

ki ab hai ḳhema-e-tanhā.ī ḳhānqāh mirī

na jaane kis ke tajassus meñ ġharq rahtī hai

bhaTaktī phirtī hai chāroñ taraf nigāh mirī

kisī ke rū-ba-rū maiñ sar-nigūñ huā hī nahīñ

mirī anā ne salāmat rakhī kulāh mirī

maiñ apne mulk-e-suḳhan se farāz chāhtā huuñ

mujhe hisār meñ rakhtī hai ab sipāh mirī

charāġh kis liye dahlīz-e-dil pe raushan haiñ

ye kis kī diid ko āñkheñ haiñ farsh-e-rāh mirī

kuchaltā rahtā huuñ ḳhauf-e-ḳhudā se shaam o sahar

ki sar uThātī nahīñ ḳhvāhish-e-gunāh mirī

maiñ apne-āp meñ sarsabz phir bhī rahtā huuñ

agarche kisht-e-tamannā hai be-giyāh mirī

na jaane kitne diloñ meñ shigāf kar Daale

agar nikal ga.ī 'aḳhtar' jo dil se aah mirī

harif-e-waqt hun sab se juda hai rah meri

na qasr-e-shah se nisbat na KHanqah meri

kisi se koi talluq na rasm-o-rah meri

ki ab hai KHema-e-tanhai KHanqah meri

na jaane kis ke tajassus mein gharq rahti hai

bhaTakti phirti hai chaaron taraf nigah meri

kisi ke ru-ba-ru main sar-nigun hua hi nahin

meri ana ne salamat rakhi kulah meri

main apne mulk-e-suKHan se faraaz chahta hun

mujhe hisar mein rakhti hai ab sipah meri

charagh kis liye dahliz-e-dil pe raushan hain

ye kis ki did ko aankhen hain farsh-e-rah meri

kuchalta rahta hun KHauf-e-KHuda se sham o sahar

ki sar uThati nahin KHwahish-e-gunah meri

main apne-ap mein sarsabz phir bhi rahta hun

agarche kisht-e-tamanna hai be-giyah meri

na jaane kitne dilon mein shigaf kar Dale

agar nikal gai 'aKHtar' jo dil se aah meri