harim-e-dil ki taraf mah-ruKHan nikal aae

harīm-e-dil kī taraf mah-ruḳhāñ nikal aa.e

hazāroñ chāñd sar-e-āsmāñ nikal aa.e

havā.eñ bharne lagīñ ḳhushbūoñ ke paimāne

jo chand phuul sar-e-shāḳh-e-jāñ nikal aa.e

ye ḳhaas baat milī ishq-zād-gāñ meñ hameñ

koī bhī zikr ho zikr-e-butāñ nikal aa.e

na vo zamīn na vo āsmāñ na vo shab-o-roz

ḳhayāl-e-yār ham āḳhir kahāñ nikal aa.e

kabhī kabhī gul-o-bulbul kī guftugū bhī suno

ajab nahīñ koī tarz-e-bayāñ nikal aa.e

kuredī jaa.e jo ḳhāk-e-dayār-e-dil-zadgāñ

navādirāt kā ganj-e-garāñ nikal aa.e

bhaTak rahī hai udāsī hamārī shahr-ba-shahr

kahīñ to kūcha-e-zinda-dilāñ nikal aa.e

dhaḌak rahā thā jo siine kī vus.atoñ meñ kahīñ

us ek zarre meñ kitne jahāñ nikal aa.e

sunā rahā thā maiñ dīvār-o-dar ko apnī ġhazal

magar vahāñ to ka.ī nukta-dāñ nikal aa.e

ḳhayāl zehn se kuchh is tarah nikaltā hai

bujhe charāġh se jaise dhuāñ nikal aa.e

dabā sake na tajassus kī aag ham 'yāvar'

sunā paḌos meñ shor-e-fuġhāñ nikal aa.e

harim-e-dil ki taraf mah-ruKHan nikal aae

hazaron chand sar-e-asman nikal aae

hawaen bharne lagin KHushbuon ke paimane

jo chand phul sar-e-shaKH-e-jaan nikal aae

ye KHas baat mili ishq-zad-gan mein hamein

koi bhi zikr ho zikr-e-butan nikal aae

na wo zamin na wo aasman na wo shab-o-roz

KHayal-e-yar hum aaKHir kahan nikal aae

kabhi kabhi gul-o-bulbul ki guftugu bhi suno

ajab nahin koi tarz-e-bayan nikal aae

kuredi jae jo KHak-e-dayar-e-dil-zadgan

nawadiraat ka ganj-e-garan nikal aae

bhaTak rahi hai udasi hamari shahr-ba-shahr

kahin to kucha-e-zinda-dilan nikal aae

dhaDak raha tha jo sine ki wusaton mein kahin

us ek zarre mein kitne jahan nikal aae

suna raha tha main diwar-o-dar ko apni ghazal

magar wahan to kai nukta-dan nikal aae

KHayal zehn se kuchh is tarah nikalta hai

bujhe charagh se jaise dhuan nikal aae

daba sake na tajassus ki aag hum 'yawar'

suna paDos mein shor-e-fughan nikal aae