harim-e-shah mein dekhi na KHanqah mein hai

harīm-e-shāh meñ dekhī na ḳhānqāh meñ hai

jo shān-e-banda-navāzī tirī nigāh meñ hai

nigāh jab se tire husn kī panāh meñ hai

har ik maqām-e-mohabbat mirī nigāh meñ hai

ye but-kade ye haram jis kī jalva-gāh meñ hai

vo mere saath azal se junūñ kī raah meñ hai

ye un kā dar hai yahāñ sar uThā ke kaun chale

yahāñ pe sar hī nahīñ dil bhī sajda-gāh meñ hai

merī jabīñ kī taraf jhuk rahe haiñ kaun-o-makāñ

ye kis kā naqsh-e-qadam aaj sajda-gāh meñ hai

tire karam ne jo rutba atā kiyā hai mujhe

ye martaba na gadā meñ na bādshāh meñ hai

na aayā hosh use jis pe paḌ ga.ī ik baar

ye kaisī mastī na jaane tirī nigāh meñ hai

tire itaab se ye raaz khul gayā hai sanam

tirā karam bhī yahāñ parda-e-gunāh meñ hai

tire jamāl kā sadqa hai ai mire jānāñ

ye raushnī bhī abhī tak jo mehr-o-māh meñ hai

gunāhgār-e-mohabbat pe ye atā terī

tire karam kī tajallī mire gunāh meñ hai

batā rahī hai 'fanā' shān-e-be-niyāzāna

adā-e-ishq bhī kuchh husn-e-kaj-kulāh meñ hai

harim-e-shah mein dekhi na KHanqah mein hai

jo shan-e-banda-nawazi teri nigah mein hai

nigah jab se tere husn ki panah mein hai

har ek maqam-e-mohabbat meri nigah mein hai

ye but-kade ye haram jis ki jalwa-gah mein hai

wo mere sath azal se junun ki rah mein hai

ye un ka dar hai yahan sar uTha ke kaun chale

yahan pe sar hi nahin dil bhi sajda-gah mein hai

meri jabin ki taraf jhuk rahe hain kaun-o-makan

ye kis ka naqsh-e-qadam aaj sajda-gah mein hai

tere karam ne jo rutba ata kiya hai mujhe

ye martaba na gada mein na baadshah mein hai

na aaya hosh use jis pe paD gai ek bar

ye kaisi masti na jaane teri nigah mein hai

tere itab se ye raaz khul gaya hai sanam

tera karam bhi yahan parda-e-gunah mein hai

tere jamal ka sadqa hai ai mere jaanan

ye raushni bhi abhi tak jo mehr-o-mah mein hai

gunahgar-e-mohabbat pe ye ata teri

tere karam ki tajalli mere gunah mein hai

bata rahi hai 'fana' shan-e-be-niyazana

ada-e-ishq bhi kuchh husn-e-kaj-kulah mein hai