harim-e-zat ke parde mein justuju yaran

harīm-e-zāt ke parde meñ justujū yārāñ

zahe-nasīb mujhe merī aarzū yārāñ

havas ko ishq batā kar tahī-kadū yārāñ

mai-e-ayāġh se chhalkā ga.e lahū yārāñ

shabāb hai mire saaqī kā āftāb kī lau

badan hai saaz meñ dīpak kī ik numū yārāñ

isī gunah ne malā.ek pe fauqiyat baḳhshī

yahī gunah bashariyyat kī aabrū yārāñ

kabhī ḳhizāñ meñ kabhī ḳhār-o-ḳhas ke parde meñ

chaman meñ bikhre haiñ har-samt rañg-o-bū yārāñ

jise maiñ ḳhud se bhī kahne kī taab lā na sakā

vo ek baat kahī un ke rū-ba-rū yārāñ

vahī to jām-e-shifā hai balā-kashoñ ke liye

vo ik nigāh jo phirtī hai chār-sū yārāñ

usī ḳhalish ne use ḳhud-kushī pe uksāyā

ki ek shaḳhs se miltā hai hū-ba-hū yārāñ

zamāna badlā hai rañg-e-chaman bhī badlegā

chīnār ab nazar aate haiñ sho.ala-rū yārāñ

harim-e-zat ke parde mein justuju yaran

zahe-nasib mujhe meri aarzu yaran

hawas ko ishq bata kar tahi-kadu yaran

mai-e-ayagh se chhalka gae lahu yaran

shabab hai mere saqi ka aaftab ki lau

badan hai saz mein dipak ki ek numu yaran

isi gunah ne malaek pe fauqiyat baKHshi

yahi gunah bashariyyat ki aabru yaran

kabhi KHizan mein kabhi KHar-o-KHas ke parde mein

chaman mein bikhre hain har-samt rang-o-bu yaran

jise main KHud se bhi kahne ki tab la na saka

wo ek baat kahi un ke ru-ba-ru yaran

wahi to jam-e-shifa hai bala-kashon ke liye

wo ek nigah jo phirti hai chaar-su yaran

usi KHalish ne use KHud-kushi pe uksaya

ki ek shaKHs se milta hai hu-ba-hu yaran

zamana badla hai rang-e-chaman bhi badlega

chinar ab nazar aate hain shoala-ru yaran