harjai si aurat Thahri

harjā.ī sī aurat Thahrī

kis kī jeb meñ daulat Thahrī

apnī nekī tohmat Thahrī

maulā terī qudrat Thahrī

siip ko motī aañkh ko aañsū

apnī apnī qismat Thahrī

maañ sā qad-āvar kaun hai jis ke

paañv ke nīche jannat Thahrī

kuchh to kaho bāzār-e-ḳhirad meñ

majnūñ kī kyā qīmat Thahrī

hosh kī bāteñ sun kar hañsnā

dīvānoñ kī aadat Thahrī

dil ke ā.īna-ḳhāne meñ

ik patthar kī mūrat Thahrī

sahrā sahrā hosh kī bāteñ

shahroñ shahroñ vahshat Thahrī

teġh-o-gulū kī jang meñ aksar

jaan se vaznī izzat Thahrī

ghar baiThe logoñ se na pūchho

mehnat kī kyā ujrat Thahrī

bhuuk pasīna pyaas kī shiddat

mazdūroñ kī ujrat Thahrī

aaj 'jamīl' is shahr-e-suḳhan meñ

badnāmī bhī shohrat Thahrī

harjai si aurat Thahri

kis ki jeb mein daulat Thahri

apni neki tohmat Thahri

maula teri qudrat Thahri

sip ko moti aankh ko aansu

apni apni qismat Thahri

man sa qad-awar kaun hai jis ke

panw ke niche jannat Thahri

kuchh to kaho bazar-e-KHirad mein

majnun ki kya qimat Thahri

hosh ki baaten sun kar hansna

diwanon ki aadat Thahri

dil ke aaina-KHane mein

ek patthar ki murat Thahri

sahra sahra hosh ki baaten

shahron shahron wahshat Thahri

tegh-o-gulu ki jang mein aksar

jaan se wazni izzat Thahri

ghar baiThe logon se na puchho

mehnat ki kya ujrat Thahri

bhuk pasina pyas ki shiddat

mazduron ki ujrat Thahri

aaj 'jamil' is shahr-e-suKHan mein

badnami bhi shohrat Thahri