hasad kisi se na ranj-o-malal rakhte hain

hasad kisī se na ranj-o-malāl rakhte haiñ

ham apnī zaat adīm-ul-misāl rakhte haiñ

kisī ke aib pe Tiktī nahīñ hamārī nigāh

nazar meñ husn to dil meñ jamāl rakhte haiñ

hamārī baat kisī ko girāñ na ho jaa.e

kahīñ pe boleñ to is kā ḳhayāl rakhte haiñ

huzūr-e-yār bhalā kaise arz-e-hāl kareñ

ham aisī taab na aisī majāl rakhte haiñ

use ubharne kā mauqa kabhī nahīñ dete

vagarna virse meñ ham bhī jalāl rakhte haiñ

ye aur baat ki anjāne laġhzisheñ ho jaa.eñ

magar shu.ūr-e-harām-o-halāl rakhte haiñ

sila vafāoñ kā kyoñ bevafā.ī hotā hai

tumhāre sāmne ham ye savāl rakhte haiñ

uchhal ke chalte nahīñ aur reñgte bhī nahīñ

hamesha chaal meñ ham e'tidāl rakhte haiñ

hamāre chehre ko har ek paḌh nahīñ saktā

ham apne aap meñ ye bhī kamāl rakhte haiñ

vo jis ne chhīnī matā-e-hayāt ai 'bebāk'

ham us se bhī to ta.alluq bahāl rakhte haiñ

hasad kisi se na ranj-o-malal rakhte hain

hum apni zat adim-ul-misal rakhte hain

kisi ke aib pe Tikti nahin hamari nigah

nazar mein husn to dil mein jamal rakhte hain

hamari baat kisi ko giran na ho jae

kahin pe bolen to is ka KHayal rakhte hain

huzur-e-yar bhala kaise arz-e-haal karen

hum aisi tab na aisi majal rakhte hain

use ubharne ka mauqa kabhi nahin dete

wagarna wirse mein hum bhi jalal rakhte hain

ye aur baat ki anjaane laghzishen ho jaen

magar shuur-e-haram-o-halal rakhte hain

sila wafaon ka kyon bewafai hota hai

tumhaare samne hum ye sawal rakhte hain

uchhal ke chalte nahin aur rengte bhi nahin

hamesha chaal mein hum e'tidal rakhte hain

hamare chehre ko har ek paDh nahin sakta

hum apne aap mein ye bhi kamal rakhte hain

wo jis ne chhini mata-e-hayat ai 'bebak'

hum us se bhi to talluq bahaal rakhte hain