hasb-e-farman-e-amir-e-qafila chalte rahe

hasb-e-farmān-e-amīr-e-qāfila chalte rahe

pā-ba-jaulāñ dīda-o-lab-doḳhta chalte rahe

be-basīrat manzileñ gard-e-safar hotī rahīñ

aur ham be-maqsad-o-be-mudda.ā chalte rahe

fasl-e-gul kī chaap thī is tab-e-nāzuk par girāñ

thā safar ḳhushbū kā ġhunche be-sadā chalte rahe

kājalī rātoñ meñ sūraj ke havāle so ga.e

iqtibās apne lahū se le liyā chalte rahe

sū-e-manzil piiTh thī āvārgī jaarī rahī

fāsla har gaam par baḌhtā rahā chalte rahe

jab ye dekhā pairahan kā taar tak baaqī nahīñ

kar ke zeb-e-jism zaḳhmoñ kī qabā chalte rahe

aap kyā ham ḳhud bhī sun paa.e na dil kī dhaḌkaneñ

apne siine par qadam rakh kar sadā chalte rahe

hasb-e-farman-e-amir-e-qafila chalte rahe

pa-ba-jaulan dida-o-lab-doKHta chalte rahe

be-basirat manzilen gard-e-safar hoti rahin

aur hum be-maqsad-o-be-muddaa chalte rahe

fasl-e-gul ki chap thi is tab-e-nazuk par giran

tha safar KHushbu ka ghunche be-sada chalte rahe

kajali raaton mein suraj ke hawale so gae

iqtibas apne lahu se le liya chalte rahe

su-e-manzil piTh thi aawargi jari rahi

fasla har gam par baDhta raha chalte rahe

jab ye dekha pairahan ka tar tak baqi nahin

kar ke zeb-e-jism zaKHmon ki qaba chalte rahe

aap kya hum KHud bhi sun pae na dil ki dhaDkanen

apne sine par qadam rakh kar sada chalte rahe