hasrat-e-did nahin zauq-e-tamasha bhi nahin

hasrat-e-dīd nahīñ zauq-e-tamāshā bhī nahīñ

kaash patthar hoñ nigāheñ magar aisā bhī nahīñ

jabr-e-dozaḳh nahīñ firdaus kā nashsha bhī nahīñ

ḳhush haiñ a.arāf meñ ham aur koī khaTkā bhī nahīñ

ab kisī huur meñ baaqī nahīñ ehsās-e-kashish

mere sar par kisī aaseb kā saaya bhī nahīñ

vo to aisā bhī hai vaisā bhī hai kaisā hai magar?

kyā ġhazab hai koī us shoḳh ke jaisā bhī nahīñ

jis kā haq thā ki bane sañg-e-malāmat kā hadaf

zahe taz.hīk vo ab shahr meñ rusvā bhī nahīñ

DhūñDh kuchh aur hī iblāġh kī sūrat ai 'sāz'

sharh o tafsīr nahīñ ramz o kināya bhī nahīñ

hasrat-e-did nahin zauq-e-tamasha bhi nahin

kash patthar hon nigahen magar aisa bhi nahin

jabr-e-dozaKH nahin firdaus ka nashsha bhi nahin

KHush hain aaraf mein hum aur koi khaTka bhi nahin

ab kisi hur mein baqi nahin ehsas-e-kashish

mere sar par kisi aaseb ka saya bhi nahin

wo to aisa bhi hai waisa bhi hai kaisa hai magar?

kya ghazab hai koi us shoKH ke jaisa bhi nahin

jis ka haq tha ki bane sang-e-malamat ka hadaf

zahe tazhik wo ab shahr mein ruswa bhi nahin

DhunDh kuchh aur hi iblagh ki surat ai 'saz'

sharh o tafsir nahin ramz o kinaya bhi nahin