hasraten KHamosh hain ujDe mazaron ki tarah

hasrateñ ḳhāmosh haiñ ujḌe mazāroñ kī tarah

valvale raushan haiñ kyoñ phir bhī sharāroñ kī tarah

kuchh na kuchh to hai dil-e-vahshī tirī āvāz meñ

varna vo kab dekhte the be-qarāroñ kī tarah

kahkashāoñ par bahakte jā rahe haiñ aaj ham

mastiyāñ bikhrī haiñ rāhoñ meñ sitāroñ kī tarah

ye kisī kī zulf bikhrī hai ki bādal chhā.e haiñ

barq lahrātī hai āñchal ke kināroñ kī tarah

rafta-rafta ik qayāmat ban gayā un kā shabāb

vo nikharte hī ga.e rangīñ nazāroñ kī tarah

jām-e-ġham piite bahakte laḌkhaḌāte jhūmte

zindagī kā lutf leñge bāda-ḳhvāroñ kī tarah

hasraten KHamosh hain ujDe mazaron ki tarah

walwale raushan hain kyon phir bhi shararon ki tarah

kuchh na kuchh to hai dil-e-wahshi teri aawaz mein

warna wo kab dekhte the be-qararon ki tarah

kahkashaon par bahakte ja rahe hain aaj hum

mastiyan bikhri hain rahon mein sitaron ki tarah

ye kisi ki zulf bikhri hai ki baadal chhae hain

barq lahraati hai aanchal ke kinaron ki tarah

rafta-rafta ek qayamat ban gaya un ka shabab

wo nikharte hi gae rangin nazaron ki tarah

jam-e-gham pite bahakte laDkhaDate jhumte

zindagi ka lutf lenge baada-KHwaron ki tarah