hasraten roti rahen dil mein mujawir ki tarah

hasrateñ rotī raheñ dil meñ mujāvir kī tarah

dil magar chup hī rahā lauh-e-maqābir kī tarah

ḳhushk pattoñ kī tarah chhuT ga.e yārān-e-kuhan

phir na palTe kabhī patjhaḌ ke musāfir kī tarah

aa tirī maañg meñ kuchh ashk pirotā jā.ūñ

maiñ to har chhāñv se guzruñgā muhājir kī tarah

maiñ huuñ ik naqsh-e-qadam dasht-e-farāmoshī kā

bhuul jāoge mujhe tum bhī musāfir kī tarah

chāragar duur na jaanā kahīñ jī Dartā hai

aaj kī raat hai gahrī shab-e-āḳhir kī tarah

dushman-e-mehr-o-vafā se koī kartā hai nibāh

kaun chāhegā tujhe tere 'musavvir' kī tarah

hasraten roti rahen dil mein mujawir ki tarah

dil magar chup hi raha lauh-e-maqabir ki tarah

KHushk patton ki tarah chhuT gae yaran-e-kuhan

phir na palTe kabhi patjhaD ke musafir ki tarah

aa teri mang mein kuchh ashk pirota jaun

main to har chhanw se guzrunga muhajir ki tarah

main hun ek naqsh-e-qadam dasht-e-faramoshi ka

bhul jaoge mujhe tum bhi musafir ki tarah

chaaragar dur na jaana kahin ji Darta hai

aaj ki raat hai gahri shab-e-aKHir ki tarah

dushman-e-mehr-o-wafa se koi karta hai nibah

kaun chahega tujhe tere 'musawwir' ki tarah