haTa kar daman-e-gesu dikha do husn surat ka

haTā kar dāman-e-gesū dikhā do husn sūrat kā

ki āġhosh-e-musībat meñ mujhe armāñ hai rāhat kā

mire nāloñ se chhoḌā taur zālim ne adāvat kā

duāoñ ko milā malbūs dāmān-e-ijābat kā

zarā to dil ko dil se rabt hone de mohabbat kā

mirī hājat se bar aa.egā matlab terī hājat kā

na niklī muñh chhupā kar ye gulū-e-ḳhushk se ġham meñ

mirī fariyād ne sīkhā asar dar-parda ismat kā

tumhārā dast-e-nāzuk aa gayā jab tauq-e-gardan par

garebān-e-musībat meñ huā paivand rāhat kā

qad-e-mauzūñ pe zulfoñ ne havā se kī jo chālākī

nazar aaya tasalsul saaf āshob-e-qayāmat kā

huā huuñ muntahī ta.alīm pā kar ishq-e-kāmil se

paḌhāo nāseh-e-mushfiq na dībācha nasīhat kā

bahut tadbīr kī lekin na niklā ye mire dil se

ilāhī hausla matlab hai kyā us kī tabī.at kā

tamannā-e-safā.ī kā na kyūñkar ḳhuuñ ho ai zālim

jigar par zaḳhm kaarī paḌ gayā teġh-e-kudūrat kā

zarā do haath meñ haath ai parī-paikar ḳhushī ho kar

sar-e-dast aap kī rāhat se hove vasl rāhat kā

gulistān-e-jahāñ meñ miT ke tujh par ai gul-e-ḳhūbī

tamanna se shagūfa ban gayā huuñ shāḳh-e-ulfat kā

hañsī mujh ko na aa.egī tumhāre gudgudāne se

musībat āshnā ke paas hai kyā kaam rāhat kā

karūñ tadbīr kyā ai ham-nafas kuchh ban nahīñ paḌtī

mirī jānib se dil TuuTā huā hai merī qismat kā

girā jo ashk chashm-e-kilk se dāmān-e-kāġhaz par

nazar aaya mujhe qatra mire āb-e-nadāmat kā

jo likhtā huuñ kabhī mazmūn-e-rāhat yār-e-bad-zan ko

dikhā kar aañkh kyā kyā ghūrtā hai ain usrat kā

karo teġh-e-nigah se qatl aa kar jāñ-nisāroñ meñ

nikal jaa.e kahīñ armāñ mire dil se shahādat kā

haTa kar daman-e-gesu dikha do husn surat ka

ki aaghosh-e-musibat mein mujhe arman hai rahat ka

mere nalon se chhoDa taur zalim ne adawat ka

duaon ko mila malbus daman-e-ijabat ka

zara to dil ko dil se rabt hone de mohabbat ka

meri hajat se bar aaega matlab teri hajat ka

na nikli munh chhupa kar ye gulu-e-KHushk se gham mein

meri fariyaad ne sikha asar dar-parda ismat ka

tumhaara dast-e-nazuk aa gaya jab tauq-e-gardan par

gareban-e-musibat mein hua paiwand rahat ka

qad-e-mauzun pe zulfon ne hawa se ki jo chaalaki

nazar aaya tasalsul saf aashob-e-qayamat ka

hua hun muntahi talim pa kar ishq-e-kaamil se

paDhao naseh-e-mushfiq na dibacha nasihat ka

bahut tadbir ki lekin na nikla ye mere dil se

ilahi hausla matlab hai kya us ki tabiat ka

tamanna-e-safai ka na kyunkar KHun ho ai zalim

jigar par zaKHm kari paD gaya tegh-e-kudurat ka

zara do hath mein hath ai pari-paikar KHushi ho kar

sar-e-dast aap ki rahat se howe wasl rahat ka

gulistan-e-jahan mein miT ke tujh par ai gul-e-KHubi

tamanna se shagufa ban gaya hun shaKH-e-ulfat ka

hansi mujh ko na aaegi tumhaare gudgudane se

musibat aashna ke pas hai kya kaam rahat ka

karun tadbir kya ai ham-nafas kuchh ban nahin paDti

meri jaanib se dil TuTa hua hai meri qismat ka

gira jo ashk chashm-e-kilk se daman-e-kaghaz par

nazar aaya mujhe qatra mere aab-e-nadamat ka

jo likhta hun kabhi mazmun-e-rahat yar-e-bad-zan ko

dikha kar aankh kya kya ghurta hai ain usrat ka

karo tegh-e-nigah se qatl aa kar jaan-nisaron mein

nikal jae kahin arman mere dil se shahadat ka