hausla koī shab-e-vasl nikalne na diyā
dard-e-dil ne mujhe ik dam bhī sañbhalne na diyā
āsmānoñ ko dilā zabt ne jalne na diyā
ātishīñ-nāla mire muñh se nikalne na diyā
ham ne dil soz-e-tap-e-hijr se jalne na diyā
saath aahoñ ke dhuāñ muñh se nikalne na diyā
bāġhiyoñ ne ye kiyā zulm misāl-e-shamshād
naḳhl-e-ummīd mirā phūlne phalne na diyā
zikr-e-gesū-e-pareshāñ se pareshāñ rakkhā
dil ko maiñ ne shab-e-furqat meñ sañbhalne na diyā
ḳhanjar-e-nāz se manzūr jo thā qatl mujhe
nīmcha miyān se qātil kī nikalne na diyā
ai masīhā tap-e-furqat bhī balā hai koī
tere bīmār-e-mohabbat ko sañbhalne na diyā
ḳhauf-e-tārājī-e-gulshan kā use thā jo ḳhayāl
naala bulbul ne kabhī muñh se nikalne na diyā
laakh phaḌkā hī kiyā maiñ ne magar ai sayyād
murġh-e-dil ko qafas-e-tan se nikalne na diyā
bāzī-e-ishq bhalā ham se vo kyā le jaatā
'fāḳhir' us shoḳh kā chakma koī chalne na diyā
hausla koi shab-e-wasl nikalne na diya
dard-e-dil ne mujhe ek dam bhi sanbhalne na diya
aasmanon ko dila zabt ne jalne na diya
aatishin-nala mere munh se nikalne na diya
hum ne dil soz-e-tap-e-hijr se jalne na diya
sath aahon ke dhuan munh se nikalne na diya
baghiyon ne ye kiya zulm misal-e-shamshad
naKHl-e-ummid mera phulne phalne na diya
zikr-e-gesu-e-pareshan se pareshan rakkha
dil ko main ne shab-e-furqat mein sanbhalne na diya
KHanjar-e-naz se manzur jo tha qatl mujhe
nimcha miyan se qatil ki nikalne na diya
ai masiha tap-e-furqat bhi bala hai koi
tere bimar-e-mohabbat ko sanbhalne na diya
KHauf-e-taraji-e-gulshan ka use tha jo KHayal
nala bulbul ne kabhi munh se nikalne na diya
lakh phaDka hi kiya main ne magar ai sayyaad
murgh-e-dil ko qafas-e-tan se nikalne na diya
bazi-e-ishq bhala hum se wo kya le jata
'faKHir' us shoKH ka chakma koi chalne na diya
Source:
Karnama-e-Nazm (Pg. 26)
-
Author:
Fakhir Lakhnavi
-
- Publisher: Munshi Nawal Kishor, Lucknow
- Year of Publication: 1889
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.