hausla lae kahan se koi diwane ka

hausla laa.e kahāñ se koī dīvāne kā

manzil-e-ġham meñ irāda hai Thahar jaane kā

silsila chhiḌ gayā jab tuur ke afsāne kā

ik bahāna to milā tere qarīb aane kā

ek muddat se ye paiġhām hai dīvāne kā

vaqt hai dār-o-rasan se bhī guzar jaane kā

pursish-e-ġham ko vo aa.e haiñ pashemāñ ho kar

zindagī kā mujhe mauqa hai na mar jaane kā

dushman-e-hosh-o-ḳhirad log kaheñge tujh ko

maiñ to mamnūn huuñ nāseh tire samjhāne kā

aap kī anjuman-e-nāz se aage baḌh kar

ik maqām aur bhī hai dil ke taḌap jaane kā

uñgliyāñ log uThāte haiñ sar-e-rāh-e-hayāt

aap kyuuñ ban ga.e unvāñ mire afsāne kā

nāḳhudā mauj-e-havādis se Darā jaatā hai

aur yahī vaqt hai tūfān se Takrāne kā

kashmakash donoñ jagah dekh rahā huuñ 'shāhid'

ab na ka.abe kā irāda hai na but-ḳhāne kā

hausla lae kahan se koi diwane ka

manzil-e-gham mein irada hai Thahar jaane ka

silsila chhiD gaya jab tur ke afsane ka

ek bahana to mila tere qarib aane ka

ek muddat se ye paigham hai diwane ka

waqt hai dar-o-rasan se bhi guzar jaane ka

pursish-e-gham ko wo aae hain pasheman ho kar

zindagi ka mujhe mauqa hai na mar jaane ka

dushman-e-hosh-o-KHirad log kahenge tujh ko

main to mamnun hun naseh tere samjhane ka

aap ki anjuman-e-naz se aage baDh kar

ek maqam aur bhi hai dil ke taDap jaane ka

ungliyan log uThate hain sar-e-rah-e-hayat

aap kyun ban gae unwan mere afsane ka

naKHuda mauj-e-hawadis se Dara jata hai

aur yahi waqt hai tufan se Takrane ka

kashmakash donon jagah dekh raha hun 'shahid'

ab na kabe ka irada hai na but-KHane ka